Read Maltese Bible with DC – IL-BIBBJA IL-KOTBA MQADDSA EŻODU 19 Bible Online

EŻODU 19 - Maltese Bible with DC – IL-BIBBJA IL-KOTBA MQADDSA bible

EŻODU 19

¹Fit-tielet xahar mill-ħruġ ta’ wlied Iżrael mill-art tal-Eġittu, dak in-nhar stess, waslu fid-deżert tas-Sinaj.

²Wara li refgħu t-tined, minn Rafidim waslu fid-deżert tas-Sinaj u waqqfu t-tined fid-deżert. Iżrael waqqaf it-tined hemm, biswit il-muntanja.

³Mosè tala’ ħdejn Alla, u l-Mulej sejjaħlu mill-muntanja u qallu: “Dan għid lil dar Ġakobb u għarraf lil ulied Iżrael:

⁴‘Rajtu intom x’għamilt lill-Eġizzjani, u kif lilkom ġarrejtkom fuq il-ġwienaħ tal-ajkli u ressaqtkom lejja.

⁵Issa, jekk tisimgħu leħni u żżommu l-patt tiegħi, intom tkunu l-wirt tiegħi minn fost il-popli kollha, għax l-art kollha tiegħi.

⁶Intom tkunu għalija saltna ta’ qassisin u ġens qaddis.’ Dan hu l-kliem li tgħid lil ulied Iżrael.”

⁷Imbagħad Mosè mar isejjaħ lix-xjuħ tal-poplu, u qegħdilhom quddiemhom dan il-kliem kollu li ordnalu l-Mulej.

⁸U l-poplu kollu wieġeb b’leħen wieħed u qalu: “Kulma qal il-Mulej aħna nagħmluh.” U Mosè ressaq kliem il-poplu quddiem il-Mulej.

⁹Il-Mulej qal lil Mosè: “Ara, jiena ġej lejk fi sħaba sewda, ħalli l-poplu jismagħni nitkellem miegħek u jemmen fik ukoll għal dejjem.” U Mosè qal lill-Mulej kliem il-poplu.

¹⁰Il-Mulej qal lil Mosè: “Mur ħdejn il-poplu u kkonsagrahom[22] illum u għada; jaħslu ħwejjiġhom

¹¹u jħejju ruħhom għat-tielet jum, għax fit-tielet jum il-Mulej jinżel fuq il-muntanja tas-Sinaj quddiem għajnejn il-poplu kollu.

¹²Ifred in-nies minn kull naħa tal-muntanja u għidilhom: ‘Qisu li ma titilgħux fuq il-muntanja jew tmissu trufijietha; min imiss il-muntanja jmut żgur;

¹³ebda id ma tmissu, iżda jħaġġruh jew jinfduh bis-sejf; ħadd ma jibqa’ ħaj, la bhima u lanqas bniedem.’ Meta ddoqq it-tromba jitilgħu lejn il-muntanja.”

¹⁴U Mosè niżel minn fuq il-muntanja għal ħdejn il-poplu u kkonsagrah, u huma ħaslu ħwejjiġhom.

¹⁵U qalilhom: “Lestu ruħkom għat-tielet jum; sadattant tersqux lejn in-nisa tagħkom.”

¹⁶Fit-tielet jum mas-sebħ kien hemm ragħad u beraq, u sħab oħxon għatta l-muntanja. Instama’ wkoll iż-żarżir qawwi tat-tromba, u triegħed il-poplu kollu fil-kamp.

¹⁷Mosè ħareġ il-poplu mill-kamp biex jiltaqgħu ma’ Alla; u waqfu f’riġlejn il-muntanja.

¹⁸Il-muntanja tas-Sinaj bdiet iddaħħan kollha kemm hi, għax niżel fuqha l-Mulej fin-nar. Id-duħħan beda tiela’ ’l fuq bħad-duħħan ta’ forn, u l-muntanja kienet titheżżeż kollha.

¹⁹Kulma jmur id-daqq tat-tromba kien dejjem jitqawwa. Imbagħad tkellem Mosè, u Alla wieġbu b’ragħda.

²⁰U niżel il-Mulej fuq il-quċċata tal-muntanja tas-Sinaj, u l-Mulej sejjaħ lil Mosè biex jitla’ fuq il-quċċata tal-muntanja. U Mosè tala’.

²¹U l-Mulej qal lil Mosè: “Inżel u wissi lill-poplu biex ma jersaqx lejn il-Mulej u jħarsu, u jmutu ħafna minnhom.

²²U l-qassisin ukoll, li jersqu lejn il-Mulej, għandhom jikkonsagraw ruħhom, li ma jaħbatx għalihom il-Mulej.”

²³U Mosè qal lill-Mulej: “Il-poplu ma jistax jitla’ fuq il-muntanja tas-Sinaj, għax inti stess ordnajtilna u għedtilna: ‘Agħmel barrikata madwar il-muntanja u kkonsagraha.’ ”

²⁴U l-Mulej qallu: “Mur, inżel u erġa’ itla’, int u Aron miegħek. Imma lill-qassisin u l-poplu tħallihomx jersqu u jitilgħu ħdejn il-Mulej, għax inkella jaħbat għalihom.”

²⁵U Mosè niżel ħdejn il-poplu u kellimhom.