Read Maltese Bible with DC – IL-BIBBJA IL-KOTBA MQADDSA EŻODU 20 Bible Online

EŻODU 20 - Maltese Bible with DC – IL-BIBBJA IL-KOTBA MQADDSA bible

EŻODU 20

¹Alla kellimhom u qalilhom dan kollu[23]:

²“Jiena hu l-Mulej, Alla tiegħek, li ħriġtek mill-art tal-Eġittu, minn dar il-jasar.

³“Ma jkollokx allat oħra għajri.

⁴La tagħmilx għalik suriet minquxa u ebda xbieha ta’ ebda ħaġa li hemm fl-għoli tas-sema, jew isfel fl-art, jew fil-baħar taħt l-art.

⁵La tmilx quddiemhom: la tadurahomx għaliex jiena hu l-Mulej Alla tiegħek, Alla għajjur[24], li npatti l-ħażen tal-missirijiet fuq l-ulied sat-tielet u r-raba’ ġenerazzjoni lil dawk li jobogħduni;

⁶imma nagħder sal-elf nisel lil min iħobbni u jżomm il-kmandamenti tiegħi.

⁷“La ssemmix l-isem tal-Mulej, Alla tiegħek, fix-xejn: għaliex lil min isemmi l-isem tiegħu fix-xejn, il-Mulej ma jħallihx bla kastig.

⁸“Ftakar f’jum is-Sibt u qaddsu.

⁹Sitt ijiem taħdem u tagħmel kulma għandek tagħmel;

¹⁰imma s-seba’ jum hu jum il-mistrieħ f’ġieħ il-Mulej, Alla tiegħek. Dan il-jum ma tagħmel ebda xogħol, int, ibnek, il-qaddej u l-qaddejja tiegħek, il-bhejjem tiegħek, u l-barrani li jkun ġewwa bwiebek.

¹¹Għax f’sitt ijiem il-Mulej għamel is-smewwiet u l-art; il-baħar u kulma hemm fihom, u strieħ fis-seba’ jum. Għalhekk il-Mulej bierek is-seba’ jum u qaddsu.

¹²“Weġġaħ lil missierek u lil ommok, sabiex jitkattru jiemek fuq l-art li l-Mulej, Alla tiegħek, jagħtik.

¹³“La toqtolx.

¹⁴“La tagħmilx adulterju.

¹⁵“La tisraqx.

¹⁶“La tagħtix xhieda giddieba kontra għajrek.

¹⁷“La tixtieqx dar għajrek: la tixtieqx il-mara ta’ għajrek, il-qaddej jew il-qaddejja tiegħu, l-għoġol jew il-ħmar tiegħu, u xejn minn kulma għandu għajrek.”

¹⁸Il-poplu kollu sama’ r-ragħad u ra l-beraq, u sama’ l-leħen tat-tromba u ra l-muntanja ddaħħan. U l-poplu beda jitriegħed u jitbeżża’, u qagħad ’il bogħod.

¹⁹Imbagħad qalu lil Mosè: “Kellimna int, u nisimgħuk; imma ma jkellimniex Alla, li ma mmutux!”

²⁰U Mosè qal lill-poplu: “La tibżgħux! Għax biex iġarrabkom ġie Alla, biex il-biża’ tiegħu jkun dejjem quddiemkom ħalli ma tidinbux.”

²¹Il-poplu qagħad ’il bogħod, u Mosè resaq lejn is-sħaba mudlama li fiha kien hemm Alla.

²²U l-Mulej qal lil Mosè: “Dan għid lil ulied Iżrael: ‘Intom rajtu li jien kellimtkom mis-sema.

²³La tagħmlux ħdejja allat tal-fidda u la tagħmlux allat tad-deheb; la tagħmluhomx.

²⁴Intom tibnu artal mit-tajn tal-art u toffru fuqu s-sagrifiċċji tagħkom tal-ħruq u tas-sliem; in-nagħaġ u l-baqar tagħkom. F’kull post li fih irrid infakkar ismi, niġi u nbierkek.

²⁵Jekk tagħmilli artal tal-ġebel, la tagħmlux tal-ġebel minġur, għax jekk inti tmidd l-għodda fuqu, jitniġġes.

²⁶U titlax bit-taraġ fuq l-artal tiegħi, biex ma tikxifx l-għera tiegħek fuqu.’ ”