Read Maltese Bible with DC – IL-BIBBJA IL-KOTBA MQADDSA EŻODU 23 Bible Online

EŻODU 23 - Maltese Bible with DC – IL-BIBBJA IL-KOTBA MQADDSA bible

EŻODU 23

¹“La taqlax xniegħa giddieba; la tagħtix idek lil bniedem ħażin biex tixhed bil-qerq.

²La tmurx mal-kotra biex tagħmel id-deni; u f’tilwima tixhidx skont il-kotra, biex ma tgħawwiġx is-sewwa.

³U anqas ma għandek tħares lejn wiċċ il-fqir fit-tilwim tiegħu.

⁴“Jekk int issib il-gendus jew il-ħmar mitluf ta’ min jobogħdok, roddhulu lura.

⁵Jekk tara l-ħmar ta’ min jobogħdok mixħut fl-art taħt it-tagħbija, tibqax għaddej bla ma tgħinu; imma għinu biex iqajmu.

⁶“La tgħawwiġx il-ġustizzja li tmiss lill-fqir fil-kawża tiegħu.

⁷Żomm ruħek ’il bogħod minn kliem il-gideb; u la toqtolx lil min hu sewwa u bla ħtija; għax jien ma neħlishiex lill-ħati.

⁸La teħux rigali, għax ir-rigali jagħmu n-nies b’għajnejhom miftuħa, u jgħawġu l-kawża tan-nies sewwa.

⁹“Taħqarx il-barrani; int taf xi jħoss il-barrani, għax barrani int kont fl-art tal-Eġittu.

¹⁰“Għal sitt snin int tiżra’ l-art tiegħek, u tiġbor l-uċuħ tagħha,

¹¹imma fis-seba’ sena tħalliha tistrieħ; ħalliha biex jieklu l-fqar tal-poplu tiegħek; u l-fdal jikluh il-bhejjem tax-xagħri. Hekk ukoll agħmel bid-dwieli u ż-żebbuġ tiegħek.

¹²“Għal sitt ijiem tagħmel ix-xogħol tiegħek; u fis-seba’ jum tistrieħ, biex jistrieħu l-gendus u l-ħmar tiegħek, u bin il-qaddejja tiegħek u l-barrani jieħdu r-ruħ.

¹³Qisu li tħarsu kulma għedtilkom, u ssemmux isem allat oħra; ma għandux jinstema’ isimhom fuq fommok.

¹⁴“Tliet darbiet fis-sena tagħmilli festa[30].

¹⁵Int tħares il-festa tal-ażżmi. Għal sebat ijiem tiekol il-ħobż ażżmu, kif jien ordnajtlek fiż-żmien li għedtlek, fix-xahar ta’ Abib, għax fih int ħriġt mill-Eġittu. Ħadd ma għandu jidher quddiemi b’idu f’idu. Int tħares il-festa tal-ħsad, l-ewwel frott ta’ xogħlok u ta’ dak li tiżra’ fir-raba’ tiegħek.

¹⁶Tagħmel il-festa tal-ġabra fi ħruġ is-sena, meta tiġbor mir-raba’ l-frott ta’ xogħlok.

¹⁷Tliet darbiet fis-sena jidher kull raġel fostkom quddiem il-Mulej, is-Sid.

¹⁸“La toffrix id-demm tal-vittmi tiegħek b’ħobż bil-ħmira; iżżommx ix-xaħam tal-vittmi tal-festa tiegħi sa filgħodu.

¹⁹“Int iġġib il-bikri tal-frott tal-art tiegħek f’dar il-Mulej Alla tiegħek. La tgħallix il-gidi f’ħalib ommu[31].

²⁰“Arani, se nibgħat anġlu quddiemek biex iħarsek fit-triq u jwasslek fil-post li jien ħejjejtlek.

²¹Qis li tagħtih wiċċ u tisma’ kliemu; la tmerihx; għax ma jaħfrilkomx dnubietkom; għax hu jkellimkom f’ismi.

²²Jekk tisma’ sewwa minn kliemu, u tagħmel kulma ngħidlek, jien inkun l-għadu tal-għedewwa tiegħek, u neħodha ma’ min jeħodha miegħek.

²³“L-anġlu tiegħi jimxi quddiemek u jwasslek għand l-Amurrin u l-Ħittin, il-Periżżin u l-Kangħanin, il-Ħiwwin u l-Ġebusin, u jiena neqridhom.

²⁴Tadurawx l-allat tagħhom u la taqduhomx; u la tagħmlux kif jagħmlu huma, imma int eqridhom u kisser il-plieri tal-ġebel tagħhom[32].

²⁵U intom tqimu l-Mulej, Alla tagħkom, u hu jbierek il-ħobż u l-ilma tiegħek; u nwarrab il-mard minn nofsok.

²⁶Ma jkunx hemm f’nofsok mara bla tfal, jew li tiled qabel iż-żmien.

²⁷Il-biża’ tiegħi nibgħat quddiemek; u nħawwad in-nies, li int tasal għandhom; u nġiegħel l-għedewwa tiegħek idawru daharhom lejk.

²⁸Jien nibgħat iż-żnażan quddiemek, u jkeċċu l-Ħiwwin, il-Kangħanin u l-Ħittin minn quddiemek.

²⁹Ma nkeċċihomx minn quddiemek f’sena, inkella l-art issir ħerba u l-bhejjem tax-xagħri joktru kontra tiegħek.

³⁰Bil-ftit il-ftit inkeċċihom minn quddiemek, sakemm int toktor u tkun tista’ tieħu l-art f’idejk.

³¹U l-fruntieri tiegħek nagħmilhomlok minn Baħar il-Qasab sal-baħar tal-Filistin, u mid-deżert sax-xmara tal-Ewfrat; għax jien nitlaq in-nies tal-art f’idejk, u int tkeċċihom minn quddiemek.

³²Ma tagħmel ebda patt magħhom, u anqas ma’ allathom.

³³Ma għandhomx jgħammru fl-art tiegħek, li ma tmurx titħajjar tidneb kontrija u tqim l-allat tagħhom, għax ikun ta’ ħsara għalik.”