Read Maltese Bible with DC – IL-BIBBJA IL-KOTBA MQADDSA EŻODU 25 Bible Online

EŻODU 25 - Maltese Bible with DC – IL-BIBBJA IL-KOTBA MQADDSA bible

EŻODU 25

¹U l-Mulej qal lil Mosè:

²“Kellem lil ulied Iżrael, biex iġibuli offerta; int tirċievi din l-offerta mingħand kull min jagħti minn rajh.

³U din hi l-offerta li tirċievi mingħandhom: deheb, fidda, u bronż;

⁴ħjut vjola, porpra u skarlatt, għażel fin, xagħar tal-mogħoż,

⁵ġlud tal-muntun miżbugħin ħomor, ġlud tad-denfil, injam tal-gażżi,

⁶żejt għall-imnariet, ħwawar għaż-żejt tal-konsagrazzjoni, ħwawar għall-inċens,

⁷ħaġar tal-oniċi, ħaġar għat-tqegħid fl-efod u l-pettorali.

⁸U jagħmluli santwarju, biex ngħammar ġo nofshom;

⁹tagħmluh skont il-mudell tat-tinda u l-għamara tagħha li se nurik.

¹⁰“Jagħmlu arka tal-gażżi; żewġt idriegħ u nofs it-tul, driegħ u nofs il-wisa’, u driegħ u nofs l-għoli tagħha.

¹¹Tiksiha b’deheb fin, minn ġewwa u minn barra, u n-naħa ta’ fuq tagħmlilha dawra tad-deheb.

¹²U ddewweb id-deheb u tagħmlilha erba’ ħolqiet, u tqegħedhomlha fuq fl-erba’ saqajn, żewġ ħolqiet f’naħa, u tnejn oħra n-naħa l-oħra.

¹³Tagħmel ukoll żewġ lasti tal-gażżi, u tiksihom bid-deheb,

¹⁴u ddaħħal il-lasti fil-ħolqiet fil-ġnub tal-arka, biex iġorruha bihom.

¹⁵Il-lasti ma tneħħihomx minnha, iżda jibqgħu dejjem fil-ħoloq tal-arka.

¹⁶U fl-arka tqiegħed ix-xhieda miktuba li se nagħtik.

¹⁷“Agħmlilha għatu tad-deheb fin, żewġt idriegħ u nofs twil, u driegħ u nofs wiesa’.

¹⁸Tagħmlilha żewġ kerubini tad-deheb mastizz[34], u tqegħedhom wieħed kull naħa fiż-żewġt itruf tal-għatu.

¹⁹Tqiegħed kerubini, wieħed f’tarf, u l-ieħor f’tarf ieħor; kull kerubin biċċa waħda mal-għatu.

²⁰Il-kerubini jkunu bil-ġwienaħ miftuħa ’l fuq u jgħattu bi ġwenħajhom l-għatu, u jħarsu lejn xulxin.

²¹U tqiegħed l-għatu fuq wiċċ l-arka, u fl-arka tqiegħed ix-xhieda miktuba li se nagħtik.

²²Hemm jien niltaqa’ miegħek, u nkellmek minn fuq l-għatu, minn bejn żewġ kerubini, li jkunu fuq l-għatu tal-arka tax-xhieda miktuba, nagħtik liġijiet għal ulied Iżrael.

²³“Agħmel mejda tal-injam tal-gażżi, twila żewġt idriegħ, u wiesgħa driegħ, u għolja driegħ u nofs;

²⁴iksiha bid-deheb fin, u għamlilha kuruna tad-deheb madwarha.

²⁵Agħmlilha wkoll tilar madwarha għoli erbat iswaba’, u kuruna tad-deheb madwar it-tilar.

²⁶Agħmlilha erba’ ħoloq tad-deheb u waħħal dawn il-ħoloq mal-erba’ rkejjen tal-erba’ saqajn tagħha.

²⁷Il-ħoloq għandhom jitwaħħlu qrib il-bastun, biex fihom jidħlu l-lasti biex jerfgħu l-mejda bihom.

²⁸Agħmel il-lasti tal-injam tal-gażżi, u iksihom bid-deheb; dawn iservu biex terfgħu l-mejda.

²⁹U int tagħmel għaliha platti, imgħaref, kwies u bwieqi għat-tiswib tal-libazzjonijiet; tagħmilhom tad-deheb fin,

³⁰u fuqha tqiegħed quddiemi għal dejjem il-ħobż tal-preżenza[35].

³¹“Int tagħmel ukoll imnara[36] tad-deheb fin; tagħmilha tad-deheb mastizz: is-sieq u l-bastun tagħha, bil-ġewż u ż-żibeġ u ż-żahar, ikunu biċċa waħda magħha.

³²Joħorġu sitt friegħi mill-ġnub tagħha, tliet friegħi minn naħa u tliet friegħi min-naħa l-oħra.

³³Ikun hemm tliet ġewżiet f’forma taż-żahar tal-lewż, biż-żibġa u l-weraq, fuq fergħa; tliet ġewżiet f’forma taż-żahar tal-lewż, biż-żibġa u l-weraq, fuq il-fergħa l-oħra; u hekk l-istess is-sitt friegħi kollha ħerġin mill-imnara.

³⁴Fl-imnara jkun hemm erba’ ġewżiet f’forma taż-żahar tal-lewż, biż-żibġa u l-weraq, u jkun hemm ġewżiet biċċa waħda magħha taħt is-sitt friegħi ħierġa minnha,

³⁵u żibġa taħt żewġ friegħi tagħha; żibġa taħt żewġ friegħi oħra; u żibġa taħt l-aħħar żewġ friegħi tagħha; hekk għas-sitt friegħi ħerġin mill-imnara.

³⁶Il-ġewżiet u l-friegħi jkunu biċċa waħda magħha; kollox biċċa waħda tad-deheb mastizz fin.

³⁷Agħmel seba’ msiebaħ għaliha u qegħedhom fuqha biex jixegħlu madwarha.

³⁸L-imqassijiet u l-bwieqi għaliha jkunu tad-deheb fin.

³⁹L-imnara bil-bċejjeċ tagħha tkun ta’ talent deheb fin.

⁴⁰Qis li tagħmilha fuq il-mudell li int rajt fuq il-muntanja.