Read Maltese Bible with DC – IL-BIBBJA IL-KOTBA MQADDSA EŻODU 28 Bible Online

EŻODU 28 - Maltese Bible with DC – IL-BIBBJA IL-KOTBA MQADDSA bible

EŻODU 28

¹“Ressaq lejk lil ħuk Aron u lil uliedu, minn fost il-poplu ta’ Iżrael, biex jaqduni bħala qassisin, Aron u wlied Aron, Nadab u Abiħu, Elgħażar u Itamar.

²U int tagħmel ilbies imqaddes għal Aron, ħuk, għall-ġieħ u għall-ġmiel tiegħu.

³Kellem lil dawk kollha li għandhom il-ħila, u li jien żejjint bl-ispirtu tal-għerf, biex jagħmlu l-ilbies ta’ Aron, biex tikkonsagrah qassis tiegħi.

⁴Dan hu l-ilbies li għandhom jagħmlu: pettorali, efod, mantar, tonka ċċangjata, turbant u terħa. Jagħmlu lbies sagru għal Aron ħuk u wliedu biex jaqduni bħala qassisin;

⁵u jieħdu biex jaħdmuhom deheb u ħajt vjola, porpra u skarlatt u għażel fin.

⁶“Jagħmlu l-efod[38] mid-deheb, vjola, porpra u skarlatt, u għażel fin, xogħol tas-sengħa.

⁷Ikollu żewġ biċċiet għal fuq l-ispallejn, imwaħħla miż-żewġt itruf biex jinqafel minn fuq.

⁸U l-faxxa li żżommu f’postu tkun tal-istess xogħol tad-deheb u vjola, porpra u skarlatt, u għażel minsuġ fin.

⁹Ħu żewġ ħaġriet tal-oniċi, u onqox fihom l-ismijiet ta’ wlied Iżrael,

¹⁰sitta fuq waħda u sitta fuq l-oħra, skont l-ordni ta’ twelidhom.

¹¹Bħalma l-arġentier jonqox iċ-ċrieket, hekk int tonqox l-ismijiet ta’ wlied Iżrael fiż-żewġ ħaġriet. Imbagħad ħithom u agħlaqhom f’dawra deheb,

¹²u waħħalhom fuq iż-żewġ bċejjeċ tal-efod, ġawhar għat-tifkira ta’ wlied Iżrael; u Aron iġib fuq spallejh l-ismijiet tagħhom b’tifkira quddiem il-Mulej.

¹³U tagħmel dwawar tad-deheb,

¹⁴u żewġ lazzijiet tad-deheb fin, mibrum bħal ħbula, u twaħħal dawn iż-żewġ lazzijiet mibruma mad-dwawar.

¹⁵“U tagħmel il-pettoral[39] tal-ġudizzju, xogħol tas-sengħa bħall-efod, tagħmlu tad-deheb, vjola, porpra u skarlatt, u għażel minsuġ fin.

¹⁶Ikun kwadru u mitwi, twil xiber b’xiber wisa’.

¹⁷U waħħal fih erba’ indani ta’ ħaġar prezzjuż: l-ewwel indana: sardju, topazju u żmerald;

¹⁸it-tieni indana: rubin, żaffir u djamant;

¹⁹it-tielet indana: ġjaċint, agta u ametist,

²⁰ir-raba’ indana: krisoltu, oniċi u djaspru. Agħlaqhom fi dwawar tad-deheb.

²¹Ikun hemm tnax-il ħaġra daqs l-ismijiet ta’ wlied Iżrael, imnaqqxa bħaċ-ċrieket, kull waħda b’isimha skont it-tnax-il tribù.

²²Għall-pettoral agħmel lazzijiet tad-deheb fin mibruma bħal ħbula;

²³u agħmillu wkoll żewġ ħolqiet tad-deheb, u qegħedhom fiż-żewġt itruf tal-pettoral.

²⁴U daħħal iż-żewġ lazzijiet tad-deheb fiż-żewġ ħolqiet fit-truf tal-pettoral.

²⁵U ż-żewġt itruf taż-żewġ lazzijiet orbothom maż-żewġ dwawar u qegħedhom fuq il-biċċa tal-efod minn quddiem.

²⁶Agħmel żewġ ħolqiet oħra tad-deheb u qegħedhom fiż-żewġt itruf tal-pettoral fuq in-naħa ta’ ġewwa li tmiss mal-efod.

²⁷U agħmel żewġ ħolqiet oħra tad-deheb, u waħħalhom minn quddiem fit-tarf t’isfel ta’ waħda mill-bċejjeċ tal-efod, fir-rabta tiegħu ’l fuq mill-faxxa tal-efod.

²⁸U jorbtu l-pettoral mill-ħoloq tiegħu mal-ħoloq tal-efod b’kurdiċella vjola, b’mod li jiġi fuq il-faxxa tal-efod, u li l-pettoral ma jinħallx minn fuq l-efod.

²⁹“Hekk Aron iġib fuq qalbu l-ismijiet ta’ wlied Iżrael fil-pettoral tal-ġudizzju meta jidħol fil-post qaddis, u jġibhom b’tifkira għal dejjem quddiem il-Mulej.

³⁰Fil-pettoral tal-ġudizzju int tqiegħed l-Urim u t-Tummim[40]. U jkunu fuq qalb Aron meta jidħol quddiem il-Mulej; hekk Aron iġib fuq qalbu dawn is-sinjali tal-ġudizzju fuq Iżrael quddiem il-Mulej għal dejjem.

³¹“Agħmel ukoll il-libsa tal-efod kollha vjola.

³²F’nofsha tagħmlilha skullatura għar-ras. Agħmel tberfila minsuġa madwar il-fetħa, bħal skullatura ta’ qmis biex ma tiċċarratx.

³³Mal-keffa tagħha ddendel bħal rummien vjola, porpra u skarlatt, bi ġlieġel tad-deheb dawramejt.

³⁴Ġolġol tad-deheb u rummiena, ġolġol tad-deheb u rummiena, mal-keffa tal-libsa, id-dawra kollha.

³⁵U jilbisha Aron kull meta jkun jagħmel is-servizz tiegħu; u l-ħoss tagħha jinstama’ meta jidħol fis-santwarju quddiem il-Mulej, u meta joħroġ; u hekk ma jmutx.

³⁶“U agħmel strixxa tad-deheb fin, u onqox bħal inċiżjoni fuq ċurkett, ‘Qaddis lill-Mulej’,

³⁷u tħitha b’kurdiċella vjola mat-turbant in-naħa ta’ quddiem.

³⁸Tkun fuq ġbin Aron, u Aron jieħu fuq spallejh il-ħtijiet li jsiru fir-riti li bihom ulied Iżrael joffru d-doni mqaddsa tagħhom; tkun fuq ġbinu, biex jogħġbu lill-Mulej.

³⁹“Agħmel it-tonka ċċangjata tal-għażel u t-turbant tal-għażel fin, u tagħmel terħa tal-insiġ.

⁴⁰“Agħmel tonok għal ulied Aron u agħmlilhom trieħi u turbant għas-sebħ u l-ġmiel tagħhom.

⁴¹U libbishom lil Aron ħuk, u lil uliedu miegħu; idlikhom u kkonsagralhom idejhom[41]; u hekk tikkonsagrahom biex ikunu qassisin tiegħi.

⁴²U int agħmlilhom qliezet tal-għażel, biex jgħattu l-għera tagħhom, minn qaddhom sa rkubbtejhom.

⁴³U jilbsuhom Aron u wliedu, meta jidħlu fit-tinda tal-laqgħa ta’ Alla jew xħin jersqu lejn l-artal biex iservu fis-santwarju; biex ma jkollhom ebda ħtija u ma jmutux. Din hi l-liġi għalih u għal nislu għal dejjem.