Read Maltese Bible with DC – IL-BIBBJA IL-KOTBA MQADDSA EŻODU 30 Bible Online

EŻODU 30 - Maltese Bible with DC – IL-BIBBJA IL-KOTBA MQADDSA bible

EŻODU 30

¹“Int tagħmel l-artal biex taħraq l-inċens fuqu, tagħmlu tal-injam tal-gażżi,

²u jkun kwadru: driegħ tul, u driegħ wisa’; u żewġt idriegħ għoli, bil-qrun ħerġin minnu.

³U int tiksih bid-deheb fin: il-wiċċ, il-ġnub dawramejt, u l-qrun. U tagħmillu kuruna tad-deheb madwaru.

⁴Tagħmillu żewġ ħolqiet tad-deheb; tqegħedhom taħt il-kuruna fuq żewġ naħat, u jkunu jservu biex jidħlu fihom il-lasti biex iġorruh bihom.

⁵Dawn il-lasti tagħmilhom mill-injam tal-gażżi, u tiksihom bid-deheb.

⁶Imbagħad tqiegħdu quddiem il-velu biswit l-arka tax-xhieda miktuba fejn jien niltaqa’ miegħek.

⁷Aron jaħraq l-inċens ifuħ fuqu; jaħarqu kull filgħodu meta jidħol biex inaddaf u jlesti l-imsiebaħ;

⁸u jaħarqu wkoll filgħaxija xħin iqiegħed l-imsiebaħ. Hekk ikun hemm dejjem inċens jaħraq quddiem il-Mulej, minn ġenerazzjoni għal oħra.

⁹Toffrux fuqu inċens profan, lanqas sagrifiċċju tal-ħruq, jew xi offerta tal-qamħ; u ssawwab xejn fuqu.

¹⁰Aron jagħmel ir-rit tal-espjazzjoni fuq qrunu darba fis-sena; jagħmel ir-rit tal-espjazzjoni darba fis-sena bid-demm tas-sagrifiċċju tal-purifikazzjoni matul il-ġenerazzjonijiet kollha; rit mill-aktar qaddis għall-Mulej.”

¹¹U l-Mulej qal lil Mosè:

¹²“Meta tiġi biex tgħodd lil ulied Iżrael, kull wieħed, malli tgħoddu, jagħti xi ħaġa lill-Mulej għall-fidwa tiegħu nnifsu, li ma jkun hemm ebda mard fostkom waqt l-għadd.

¹³Kull min ikun magħdud iħallas dan: nofs xekel skont ix-xwiekel tas-santwarju - xekel ta’ għoxrin gera - u nofs xekel bħala offerta lill-Mulej.

¹⁴Kull wieħed li jgħaddi mal-magħdudin, minn għoxrin sena ’l fuq, iħallas it-taxxa tal-Mulej.

¹⁵Ħadd, la sinjur u anqas fqir, ma għandu jħallas aktar jew inqas minn nofs xekel għall-fidwa tiegħu nnifsu meta jagħmlu l-offerta tal-Mulej.

¹⁶Il-flus tal-fidwa li tiġbor mingħand il-poplu jmorru għall-ħtiġiet tat-tinda tal-laqgħa; hekk din l-offerta sservi biex tfakkar il-Mulej f’ulied Iżrael, għall-fidwa tagħkom infuskom.”

¹⁷Il-Mulej qal lil Mosè:

¹⁸“Int tagħmel ukoll ħawt tal-bronż, bil-maqgħad tal-bronż, għall-ħasil. Tqiegħdu bejn it-tinda tal-laqgħa u l-artal, u timlieh bl-ilma.

¹⁹Fih Aron u wliedu jaħslu idejhom u riġlejhom.

²⁰Kull meta jidħlu fit-tinda, jew kull meta jersqu jservu ħdejn l-artal u joffru s-sagrifiċċju tal-ħruq lill-Mulej, huma għandhom jinħaslu bl-ilma, inkella jmutu.

²¹Jaħslu idejhom u riġlejhom, inkella jmutu; din hi liġi għal dejjem għalihom, għalih u għal nislu minn ġenerazzjoni għal oħra.”

²²Il-Mulej kellem lil Mosè u qallu:

²³“Ħu mill-aħjar ħwawar; ħames mitt xekel ta’ mirra safja; daqs nofsha kannella tfuħ, jiġifieri, mitejn u ħamsin xekel; mitejn u ħamsin xekel oħra qasab tal-fwieħa;

²⁴ħames mitt xekel kassja skont ix-xekel tas-santwarju; u ħinn żejt taż-żebbuġ.

²⁵B’dawn kollha tagħmel iż-żejt għad-dlik imqaddes; fwieħa maħduma bis-sengħa ta’ fewwieħ; ikun żejt ikkonsagrat għall-unzjonijiet.

²⁶Bih int tidlek it-tinda tal-laqgħa u l-arka tax-xhieda miktuba;

²⁷il-mejda u t-tagħmir kollu tagħha; l-imnara u l-bċejjeċ tagħha kollha; l-artal tal-inċens;

²⁸u l-artal tas-sagrifiċċju tal-ħruq bit-tagħmir kollu tiegħu; u l-ħawt u l-maqgħad tiegħu.

²⁹Int tikkonsagrahom biex ikunu ħwejjeġ mill-aktar qaddisa; u kulma jmiss magħhom jitqaddes.

³⁰Int tidlek lil Aron u wliedu, u tikkonsagrahom biex iservuni ta’ qassisin.

³¹Int tgħid lill-poplu ta’ Iżrael: ‘Dan ikun għalija ż-żejt qaddis tal-konsagrazzjoni, minn nisel għal nisel tagħkom.

³²Ma għandux jissawwab fuq ġisem il-bniedem, u tagħmilx taħlita oħra bħalha; għax hu kkonsagrat u għandu jkun qaddis għalikom.

³³Min jagħmel taħlita bħalha, jew min isawbu fuq xi wieħed profan, jinqata’ minn niesu.’ ”

³⁴U l-Mulej qal lil Mosè: “Ħu daqs wieħed minn dawn il-ħwawar: stakti, bebbux ifuħ, galbanu, u inċens ifuħ.

³⁵Agħmel minnhom inċens ifuħ, imħallat bil-melħ, taħlita bħal tal-fewwieħ, safja u qaddisa.

³⁶Isħaq ftit minnu fi trab irqiq, u qiegħed ftit minnu quddiem ix-xhieda miktuba fit-tinda tal-laqgħa, fejn jien niltaqa’ miegħek: tkun għalikom ħaġa mill-aktar qaddisa.

³⁷U dan l-inċens li int tagħmel skont din it-taħlita, tagħmlux bħalu; għalikom tkun ħaġa kkonsagrata lill-Mulej.

³⁸Min jagħmel bħalha biex jitfewwaħ biha, jinqata’ minn niesu.”