Read Maltese Bible with DC – IL-BIBBJA IL-KOTBA MQADDSA EŻODU 33 Bible Online

EŻODU 33 - Maltese Bible with DC – IL-BIBBJA IL-KOTBA MQADDSA bible

EŻODU 33

¹Il-Mulej kellem lil Mosè: “Mur, itla’ minn hawn, int u l-poplu li int tellajt mill-Eġittu, lejn l-art li jien ħlift li nagħti lil Abraham, lil Iżakk, u lil Ġakobb; u għedtilhom: ‘Lil nislek nagħtiha.’

²Jien nibgħat l-anġlu tiegħi quddiemek u nkeċċi minn quddiemek il-Kangħanin u l-Amurrin, il-Ħittin u l-Periżżin, il-Ħiwwin u l-Ġebusin;

³lejn art tnixxi ħalib u għasel. Jien ma nitlax f’nofskom magħkom, għax int poplu ta’ ras iebsa, li ma mmurx neqirdek fit-triq.”

⁴Il-poplu sama’ din l-aħbar ħażina, sewdu qalbhom, u ħadd ma libes ħwejjeġ sbieħ fuqu.

⁵U l-Mulej qal lil Mosè: “Għid lil ulied Iżrael: ‘Intom poplu ta’ ras iebsa. Jekk jiena niġi magħkom, f’waqt wieħed jien nista’ neqirdek. U issa neħħi t-tiżjin kollu minn fuqek, u nkun naf x’għandi nagħmillek.’ ”

⁶U wlied Iżrael neħħew minn fuqhom it-tiżjin kollu, minn mindu ħallew il-muntanja tal-Ħoreb ’il quddiem.

⁷Mosè kien jieħu tinda u jwaqqafha barra l-kamp, u ’l bogħod mill-kamp, u semmieha: ‘It-tinda tal-laqgħa[47]’. Kull min kien ifittex il-Mulej, kien joħroġ lejn it-tinda tal-laqgħa, li kienet barra l-kamp.

⁸Kull meta Mosè kien joħroġ lejn it-tinda kien iqum il-poplu kollu u kull wieħed kien joqgħod wieqaf quddiem it-tinda, u jħarsu lejn Mosè sa ma jidħol fit-tinda.

⁹Kull meta Mosè kien jidħol fit-tinda kienet tinżel kolonna ta’ sħab, u tieqaf fil-bieb, u titkellem ma’ Mosè.

¹⁰Il-poplu kollu kien jara din il-kolonna ta’ sħab wieqfa fil-bieb tat-tinda, u kien iqum il-poplu kollu, u jmilu u jinżlu wiċċhom fl-art, kulħadd quddiem il-bieb tat-tinda tiegħu.

¹¹Il-Mulej kien ikellem lil Mosè wiċċ imb wiċċ, bħalma bniedem ikellem lil ħabibu; imbagħad Mosè kien jerġa’ lura lejn il-kamp; imma Ġożwè bin Nun, żagħżugħ, ma kienx joħroġ mit-tinda.

¹²Mosè kellem lill-Mulej u qallu: “Ara, int għedtli: ‘Talla’ lil dan il-poplu,’ u ma għedtlix lil min se tibgħat miegħi. U int għedt: ‘Jien nafek b’ismek, u int sibt ukoll ħniena f’għajnejja.’

¹³U issa, jekk jien tassew sibt ħniena quddiemek, għallimni triqatek, biex nagħrfek u nsib ħniena quddiemek. Qis ukoll li dan il-ġens hu l-poplu tiegħek.”

¹⁴U l-Mulej wieġeb: “Il-preżenza tiegħi tiġi miegħek[48], u nserraħlek rasek.”

¹⁵U qallu: “Jekk il-preżenza tiegħek ma tiġix magħna, ittellagħniex minn hawn.

¹⁶Kif se nkun naf jekk sibtx ħniena quddiemek, jien u l-poplu tiegħek? Mhux għax inti timxi magħna ningħażlu, jien u l-poplu tiegħek, mill-popli l-oħra kollha li jinsabu fuq wiċċ l-art?”

¹⁷U l-Mulej wieġeb lil Mosè: “Jien nagħmel dan li għedtli, għax int sibt ħniena quddiemi u għaraftek b’ismek.”

¹⁸Mosè qal lill-Mulej: “Ħallini, nitolbok, nara l-glorja tiegħek.”

¹⁹U l-Mulej wieġbu: “Jiena ngħaddi tjubiti kollha minn quddiemek, u ngħajjat l-isem tiegħi ‘Jaħweh’ quddiemek. Jiena nħenn għal min irrid inħenn, u nitħassar lil min irrid nitħassar.”

²⁰U żied jgħidlu: “Imma int ma tistax tara ’l wiċċi, għax ebda bniedem ma jarani u jibqa’ ħaj.”

²¹U l-Mulej qal lil Mosè: “Ara, hawn post ħdejja, fejn tista’ toqgħod fuq il-blata.

²²U hija u għaddejja l-glorja tiegħi, inqiegħdek f’xaqq il-blata, u ngħattik b’idi sakemm ngħaddi.

²³Imbagħad inneħħi idi, u tara dahri, għax wiċċi ma jarah ħadd.”