Read Maltese Bible with DC – IL-BIBBJA IL-KOTBA MQADDSA EŻODU 35 Bible Online

EŻODU 35 - Maltese Bible with DC – IL-BIBBJA IL-KOTBA MQADDSA bible

EŻODU 35

¹Mosè laqqa’ l-ġemgħa kollha ta’ wlied Iżrael u qalilhom: “Dawn huma l-kmandamenti tal-Mulej biex tħarsuhom.

²“Għal sitt ijiem taħdmu u s-seba’ jum ikun imqaddes għalikom; ikun mistrieħ kbir għall-Mulej. Kull min jaħdem f’dan il-jum jagħtuh il-mewt.

³Tkebbsux nar fi djarkom f’jum is-Sibt.”

⁴U Mosè kellem lill-ġemgħa kollha ta’ Iżrael u qalilhom: “Dan hu l-kmandament li l-Mulej Alla kkmandakom meta qal:

⁵Ħudu milli għandkom offerta lill-Mulej. Kull min jitħajjar jagħti minn qalbu ħa jġib l-offerti quddiem il-Mulej: deheb, fidda, u bronż;

⁶vjola, porpra u skarlatt; għażel fin; xagħar tal-mogħoż,

⁷ġlud tal-muntun miżbugħin ħomor u ġlud tad-denfil; injam tal-gażżi;

⁸żejt għall-imnariet, ħwawar għaż-żejt tal-konsagrazzjoni u għall-inċens ifuħ;

⁹ħaġar tal-oniċi u ħaġar għat-tqegħid fl-efod u l-pettoral.

¹⁰“Ħa jersqu n-nies kollha tas-sengħa li hemm fostkom u jagħmlu dak kollu li ordna l-Mulej:

¹¹it-tabernaklu, it-tinda u l-għata tagħha, l-anelli u l-imqagħad tagħha;

¹²l-arka u l-lasti tagħha, l-għatu tagħha, u l-purtiera tal-velu;

¹³il-mejda u l-lasti, it-tagħmir kollu tagħha, u l-ħobż tal-preżenza;

¹⁴l-imnara għad-dawl u l-bċejjeċ tagħha, u l-imsiebaħ tagħha u ż-żejt għad-dawl;

¹⁵u l-artal tal-inċens u l-lasti tiegħu, iż-żejt tal-konsagrazzjoni u l-inċens ifuħ; u l-purtiera għall-bieb fi dħul it-tabernaklu;

¹⁶l-artal tas-sagrifiċċju u l-gradilja tal-bronż, il-lasti tiegħu u t-tagħmir kollu tiegħu, il-ħawt u l-maqgħad tiegħu.

¹⁷Id-drapp għall-bitħa, il-pilastri u l-imqagħad tagħhom, u l-purtiera għall-bieb tal-bitħa.

¹⁸Il-minċotti tat-tabernaklu u l-ganċijiet għall-bitħa u l-ħbula tagħhom;

¹⁹l-ilbies tas-servizz għas-servizz fil-post qaddis, l-ilbies sagru għal Aron, il-qassis, u l-ilbies għal uliedu għas-servizz tagħhom ta’ qassisin.

²⁰U l-ġemgħa kollha ta’ Iżrael telqu minn quddiem Mosè.

²¹Kull min ħass f’qalbu u tħajjar f’ruħu, ġieb offerta lill-Mulej biex issir it-tinda tal-laqgħa u l-ħwejjeġ għas-servizz u l-ilbies sagru.

²²U ġew, irġiel u nisa, dawk kollha li tħajru jagħtu minn qalbhom u ġiebu labar u msielet u ċrieket u brazzuletti, u kull xorta ta’ oġġetti tad-deheb; u kulħadd għamel offerta tad-deheb lill-Mulej.

²³Kull min imbagħad kellu vjola, jew porpra jew skarlatt, għażel fin, xagħar tal-mogħoż jew ġlud tal-muntun miżbugħin ħomor u ġlud tad-denfil, ġiebhom.

²⁴Kull min seta’ joffri fidda jew bronż, ġiebhom bħala offerta quddiem il-Mulej; hekk ukoll kull min kellu injam tal-gażżi tajjeb għax-xogħol, ġiebu wkoll.

²⁵U n-nisa li kellhom il-ħila għażlu b’idejhom u ġiebu ħjut tal-għażel; vjola, porpra u skarlatt, u għażel fin;

²⁶u n-nisa kollha li moħħhom kien jagħtihom għażlu x-xagħar tal-mogħoż.

²⁷U l-kbarat ġiebu ħaġar tal-oniċi u ħaġar għat-tqegħid fl-efod u l-pettoral;

²⁸ħwawar u żejt għad-dawl u għaż-żejt tal-konsagrazzjoni u l-inċens ifuħ.

²⁹L-irġiel u n-nisa kollha ta’ Iżrael, li tħajru jagħtu minn qalbhom għax-xogħol kollu li Alla kkmanda lil Mosè jagħmel, ġiebu l-offerta minn rajhom lill-Mulej.

³⁰U Mosè qal lill-poplu ta’ Iżrael: “Araw il-Mulej sejjaħ b’isimhom ’il Besalel bin Uri, bin Ħur, mit-tribù ta’ Ġuda,

³¹u mlieh bl-ispirtu ta’ Alla u bil-ħila, id-dehen, l-għerf, u s-sengħa

³²biex ifassal u jaħdem fid-deheb u fil-fidda u fil-bronż;

³³jonqox il-ħaġar għat-tqegħid u jaħdem l-injam u jagħmel kull xogħol ieħor tas-sengħa.

³⁴Tah id-dehen, lilu u lil Oħolijab bin Aħisamak mit-tribù ta’ Dan, biex jgħallmu.

³⁵Imliehom bil-ħila li jagħmlu kull xogħol ta’ nqix, u nsiġ u rakkmu bil-ħjut fil-vjola, porpra u skarlatt, u għażel fin, u nsiġ imżewwaq; nies ta’ ħila, kapaċi għal kull xorta ta’ xogħol u kull xorta ta’ tifsil.”