Read Maltese Bible with DC – IL-BIBBJA IL-KOTBA MQADDSA EŻODU 36 Bible Online

EŻODU 36 - Maltese Bible with DC – IL-BIBBJA IL-KOTBA MQADDSA bible

EŻODU 36

¹Besalel u Oħolijab u kull bniedem tas-sengħa li l-Mulej tah għerf u dehen, biex jagħrfu jaħdmu kull xogħol meħtieġ għas-servizz tas-santwarju, ħadmu skont kulma kien ordna l-Mulej.

²Mosè sejjaħ lil Besalel u ’l Oħolijab u kull bniedem tas-sengħa li l-Mulej tah l-għerf u ’l dawk kollha li għamlu l-qalb li joffru ruħhom għax-xogħol.

³U ħadu mingħand Mosè l-offerti kollha li l-poplu ta’ Iżrael kien ġieb minn rajh għas-servizz tas-santwarju li kellu jsir. Imma l-poplu baqa’ jġiblu offerti għodwa wara l-oħra.

⁴U ġew in-nies tas-sengħa, li kienu jaħdmu x-xogħol tas-santwarju, kull wieħed minn fuq ix-xogħol li kien qiegħed jagħmel,

⁵u qalu lil Mosè: “In-nies qegħdin iġibu iżjed milli jeħtieġ għax-xogħol li ordnalna nagħmlu l-Mulej.”

⁶Imbagħad Mosè ordna li jxerrdu l-kelma fil-kamp li tgħid: “Ebda raġel jew mara m’għandhom jagħmlu xejn iżjed biex joffru għas-santwarju” u l-poplu ma tħalliex iġib iżjed

⁷għax kien hemm biżżejjed, anzi ż-żejjed, għax-xogħol li kellu jsir.

⁸Imbagħad in-nies tas-sengħa fost il-ħaddiema għamlu t-tabernaklu b’għaxar purtieri tal-għażel minsuġ fin, vjola, porpra u skarlatt, bil-kerubini minsuġin fihom bis-sengħa.

⁹Kull purtiera kienet tmienja u għoxrin driegħ twila u erbat idriegħ wiesgħa, kollha daqs wieħed.

¹⁰U ħames purtieri minnhom għaqqadhom flimkien waħda mal-oħra; u hekk ukoll il-ħamsa l-oħra għaqqadhom waħda mal-oħra.

¹¹U għamel qfieli vjola fil-keffa tal-purtiera ta’ barra ta’ sett minnhom, u hekk ukoll għamel fil-keffa tal-purtiera ta’ barra tat-tieni sett.

¹²Għamel ukoll ħamsin qafla f’purtiera waħda, u ħamsin qafla fil-keffa tal-purtiera tat-tieni sett; il-qfieli kienu jaqblu waħda mal-oħra.

¹³Għamel ukoll ħamsin ħolqa tad-deheb, u għaqqad il-purtieri flimkien waħda mal-oħra bil-ħoloq, u hekk it-tabernaklu sar ħaġa waħda.

¹⁴Għamel ukoll purtieri tax-xagħar tal-mogħoż għat-tinda tat-tabernaklu; ħdax-il purtiera għamel minnhom.

¹⁵Kull purtiera kienet ta’ tletin driegħ tul u l-wisa’ tagħha erbat idriegħ; il-ħdax-il purtiera kienu daqs wieħed.

¹⁶Ħames purtieri minnhom għaqqadhom flimkien, u hekk ukoll is-sitta l-oħra.

¹⁷Imbagħad għamel ħamsin qafla fil-keffa tal-purtiera ta’ barra f’sett, u ħamsin qafla oħra fil-keffa tal-purtiera ta’ barra tas-sett l-ieħor.

¹⁸Għamel ukoll ħamsin ħolqa tal-bronż biex jgħaqqad it-tinda u ssir ħaġa waħda.

¹⁹Għamel ukoll għata mill-ġlud tal-muntun miżbugħin ħomor u għata tad-denfil għal fuq kollox.

²⁰U għamel twavel wieqfa tal-gażżi għat-tabernaklu.

²¹Kull waħda kienet għaxart idriegħ twila, u driegħ u nofs wiesgħa.

²²Kien hemm żewġ minċotti f’kull tavla, biex jgħaqqadhom ma’ xulxin; u għamel l-istess bit-twavel kollha tat-tabernaklu.

²³U qassam it-twavel tat-tabernaklu b’dan il-mod: għoxrin tavla n-naħa t’isfel, iħarsu lejn in-Nofsinhar;

²⁴u għamel erbgħin maqgħad tal-fidda taħt l-għoxrin tavla; tnejn taħt waħda għaż-żewġ minċotti tagħha, u żewġ imqagħad għal taħt l-oħra għaż-żewġ minċotti tagħha.

²⁵U fuq it-tieni naħa li tħares lejn it-Tramuntana, għoxrin tavla oħra,

²⁶bl-erbgħin maqgħad tagħhom tal-fidda, tnejn taħt waħda u tnejn taħt oħra.

²⁷Fuq in-naħa ta’ wara li tħares lejn il-Punent għamel sitt twavel.

²⁸U għamel żewġ twavel ukoll għall-kantunieri tan-naħa ta’ wara;

²⁹minn isfel kienu magħqudin ma’ xulxin, u mir-ras kienu jidħlu f’ħolqa waħda; u għamel l-istess għat-tnejn: dawn kienu jservu għaż-żewġ kantunieri.

³⁰U kien hemm tmien twavel bil-maqgħad tagħhom tal-fidda, sittax-il maqgħad b’kollox, żewġ imqagħad taħt tavla, u żewġ imqagħad taħt oħra.

³¹U għamel traversi tal-gażżi; ħamsa għat-twavel ta’ naħa,

³²u ħamsa għan-naħa l-oħra tat-tabernaklu; ħamsa oħra għan-naħa ta’ wara tat-tabernaklu, li tħares lejn il-Punent.

³³U t-traversa tan-nofs, f’nofs l-għoli tat-twavel, tgħaddi minn tarf għall-ieħor.

³⁴U kesa t-twavel bid-deheb; u għamel ħoloq tad-deheb, biex iżommu t-traversi, u kesa t-traversi bid-deheb.

³⁵Għamel ukoll il-velu tal-għażel minsuġ fin, fil-vjola, porpra u skarlatt, b’kerubini minsuġin fih, xogħol tas-sengħa.

³⁶U għamillu erba’ kolonni tal-gażżi bil-ganċijiet tagħhom tad-deheb, u erba’ mqagħad tal-fidda mdewba.

³⁷Għamel ukoll purtiera fid-dħul tat-tabernaklu tal-għażel minsuġ fin, vjola, porpra u skarlatt, xogħol in-nissieġ.

³⁸U kesa bid-deheb il-ħames kolonni tagħhom, il-ganċijiet tagħhom, l-irjus, u l-ħoloq tagħhom. U għamel l-imqagħad tagħhom tal-bronż.