Read Maltese Bible with DC – IL-BIBBJA IL-KOTBA MQADDSA EŻODU 39 Bible Online

EŻODU 39 - Maltese Bible with DC – IL-BIBBJA IL-KOTBA MQADDSA bible

EŻODU 39

¹Bil-vjola, imbagħad, bil-porpra u bl-iskarlatt, ħadem l-ilbies tas-servizz biex iservu fis-santwarju; għamlu lbies sagru għal Aron kif kien ordna l-Mulej lil Mosè.

²Għamel l-efod mid-deheb, vjola, porpra u skarlatt, u għażel mibrum.

³Għamel id-deheb f’folji rqaq u qatagħhom fi ħjut, biex jaħdmuhom mal-vjola, il-porpra u l-iskarlatt, u l-għażel mibrum fin: xogħol ta’ wieħed tas-sengħa.

⁴Għalih għamlu wkoll bċejjeċ jinqaflu għall-ispallejn. Kienu jinqaflu wkoll fiż-żewġt itruf tiegħu.

⁵U għamlu l-faxxa li kienet tgħaddi minn fuqu biex iżżommu f’postu, tal-istess xogħol tad-deheb u l-vjola, porpra u skarlatt, u għażel minsuġ fin, bħalma l-Mulej kien ordna lil Mosè.

⁶Ħadmu l-ħaġar tal-oniċi, għalquhom fi dwawar tad-deheb, u naqqxuhom bħalma jnaqqxu ċ-ċrieket, għall-ismijiet ta’ wlied Iżrael.

⁷Qegħduhom fuq iż-żewġ bċejjeċ tal-efod, ġawhar għat-tifkira ta’ wlied Iżrael, bħalma l-Mulej kien ordna lil Mosè.

⁸U għamel il-pettoral, bħax-xogħol tal-efod, xogħol tad-deheb, vjola, porpra u skarlatt, u għażel fin.

⁹Kien kwadru, mitwi fi tnejn, twil xiber u ieħor wiesa’.

¹⁰Waħħlu fih erba’ indani ħaġar prezzjuż: fl-ewwel indana qiegħdu: sardju, topazju u żmerald.

¹¹Fit-tieni indana: rubin, żaffir u djamant.

¹²Fit-tielet indana: ġjaċint, agta u ametist;

¹³fir-raba’ indana: krisoltu, oniċi u djaspru; u għalquhom fi dwawar tad-deheb.

¹⁴U kien hemm tnax-il ħaġra skont l-għadd tat-tribujiet ta’ Iżrael; u kienu bħaċ-ċrieket, kull waħda b’isem tribù ta’ Iżrael imnaqqax fih.

¹⁵U għamel għall-pettoral lazzijiet tad-deheb fin mibrum bħal ħbula;

¹⁶u għamillu wkoll żewġ dwawar tad-deheb u żewġ ħolqiet tad-deheb; u qiegħdu ż-żewġ ħolqiet fiż-żewġt itruf tal-pettoral;

¹⁷u daħħlu ż-żewġ lazzijiet tad-deheb fiż-żewġ ħolqiet fit-truf tal-pettoral.

¹⁸Iż-żewġt itruf taż-żewġ lazzijiet rabtuhom maż-żewġ dwawar u qegħduhom fuq il-biċċa tal-efod minn quddiem.

¹⁹Għamlu żewġ ħolqiet oħra tad-deheb u qegħduhom fiż-żewġt itruf tal-pettoral fuq in-naħa ta’ ġewwa li tmiss mal-efod.

²⁰U għamlu żewġ ħolqiet oħra tad-deheb, u waħħluhom minn quddiem fit-tarf t’isfel ta’ waħda mill-bċejjeċ tal-efod fir-rabta tiegħu ’l fuq mill-faxxa tal-efod.

²¹U rabtu mill-ħoloq tiegħu mal-ħoloq tal-efod b’kurdiċella b’mod li jiġi fuq il-faxxa tal-efod, u li l-pettoral ma jinħallx minn fuq l-efod, bħalma kien ordna l-Mulej.

²²Għamlu wkoll il-libsa tal-efod, xogħol in-nissieġ, kollha vjola,

²³bl-iskullatura tal-libsa f’nofsha, bħal skullatura ta’ qmis, bi tberfila madwarha biex ma tiċċarratx.

²⁴U dendlu fil-keffa tal-libsa bħal rummien vjola, porpra u skarlatt bi ħjut tal-għażel mibrum fin.

²⁵Għamlu wkoll ġlieġel tad-deheb fin, u dendluhom bejn ir-rummien fil-keffa tal-libsa dawramejt, f’nofs ir-rummien:

²⁶ġolġol u rummiena, ġolġol u rummiena fil-keffa tal-libsa madwarha kollu għas-servizz, bħalma kien ordna l-Mulej lil Mosè.

²⁷Għamlu l-ilbiesi tal-għażel, xogħol in-nissieġ, għal Aron u wliedu:

²⁸it-turbant tal-għażel, u l-ornament tat-turbant, u l-qliezet tal-għażel mibrum fin,

²⁹u t-terħa tal-għażel mibrum, vjola, porpra u skarlatt, xogħol tar-rakkmu, kif kien ordna l-Mulej lil Mosè.

³⁰Għamlu wkoll l-istrixxa rqiqa tad-deheb fin għall-kuruna mqaddsa, u naqqxu u kitbu fuqha: ‘Qaddis lill-Mulej’, bħal inċiżjoni fuq ċurkett.

³¹U rabtu magħha kurdiċella vjola biex titwaħħal mat-turbant, kif ordna l-Mulej lil Mosè.

³²Hekk intemmet l-opra sħiħa tat-tabernaklu, tat-tinda tal-laqgħa; u wlied Iżrael għamlu kollox kif kien ordna l-Mulej lil Mosè.

³³U ġiebu għand Mosè, it-tabernaklu, it-tinda, u t-tagħmir kollu tagħhom: il-ganċijiet, it-twavel, it-traversi, il-pilastri u l-imqagħad tiegħu;

³⁴l-għata tal-ġild tal-muntun miżbugħ aħmar; l-għata ta’ ġild id-denfil, il-purtiera ta’ barra;

³⁵l-arka tax-xhieda u l-lasti tagħha u l-għatu;

³⁶il-mejda u l-partijiet tagħha kollha u l-ħobż tal-preżenza;

³⁷l-imnara tad-deheb fin bl-imsiebaħ u t-tagħmir tagħhom u l-partijiet kollha tagħha u ż-żejt għall-mixegħla;

³⁸l-artal tad-deheb; iż-żejt tal-konsagrazzjoni, l-inċens ifuħ; il-purtiera tal-bieb tat-tinda;

³⁹l-artal tal-bronż u l-gradilja tiegħu tal-bronż; il-lasti u t-tagħmir tiegħu kollu, il-ħawt u l-maqgħad tiegħu;

⁴⁰id-drapp tal-bitħa, il-pilastri tagħha, l-imqagħad tagħha, il-purtiera tal-bieb tal-bitħa, il-ħbula u l-imsiemer tagħha, bit-tagħmir kollu meħtieġ għat-tabernaklu, għat-tinda tal-laqgħa;

⁴¹l-ilbies għas-servizz fis-santwarju, l-ilbies ikkonsagrat għal Aron il-qassis, u l-ilbies għal uliedu biex iservu ta’ qassisin.

⁴²Kollox kif kien ordna l-Mulej lil Mosè, u hekk ulied Iżrael temmew ix-xogħol kollu.

⁴³Mosè ra x-xogħol kollu u ra li għamluh kollu kif kien ordna l-Mulej, u Mosè berikhom.