Read Maltese Bible with DC – IL-BIBBJA IL-KOTBA MQADDSA EŻODU 6 Bible Online

EŻODU 6 - Maltese Bible with DC – IL-BIBBJA IL-KOTBA MQADDSA bible

EŻODU 6

¹U l-Mulej wieġeb lil Mosè: “Issa tara x’nagħmel lill-Fargħun, għax bis-saħħa jkollu jibgħathom, u bis-saħħa jkeċċihom ’il barra minn pajjiżu.”

²U raġa’ kellem lil Mosè u qallu: “Jiena Jaħweh.

³Jien dhert lil Abraham, lil Iżakk u lil Ġakobb bħala El-Xaddaj[8]. Imma ismi Jaħweh ma għarrafthulhomx.

⁴Jien għamilt ukoll il-patt tiegħi magħhom, li nagħtihom l-art ta’ Kangħan, l-art fejn kienu jiġġerrew fiha bħala barranin.

⁵U issa wkoll smajt il-krib ta’ wlied Iżrael, miżmuma b’ilsiera mill-Eġizzjani, u ftakart fil-patt tiegħi.

⁶Għalhekk għid lil ulied Iżrael: ‘Jiena Jaħweh, u jien noħroġkom minn taħt il-madmad tal-Eġittu u neħliskom mill-jasar tagħkom, u nifdikom bis-saħħa ta’ driegħi u nagħmel ħaqq minnhom b’għemejjel kbar.

⁷Jien naħtarkom u neħodkom biex tkunu l-poplu tiegħi, u jiena nkun Alla tagħkom, u tkunu tafu li jien Jaħweh, il-Mulej, Alla tagħkom, li ħeliskom minn taħt il-madmad tal-Eġittu.

⁸U nwassalkom fl-art li jien b’idi merfugħa ħlift li nagħtiha lil Abraham, lil Iżakk, lil Ġakobb, u li nagħtiha lilkom biex tirtuha. Jien hu Jaħweh.’ ”

⁹U Mosè kellem hekk lil ulied Iżrael u ma semgħux minnu minħabba l-qtigħ il-qalb u l-kefrija tal-jasar.

¹⁰Il-Mulej kellem lil Mosè u qallu:

¹¹“Mur kellem lill-Fargħun, sultan tal-Eġittu, biex iħalli ’l ulied Iżrael jitilqu minn artu.”

¹²U Mosè tkellem quddiem il-Mulej u qal: “Ara, ulied Iżrael ma semgħux minni, se jisma’ minni l-Fargħun, jien li ma għandix xufftejja maħtuna?”

¹³U l-Mulej kellem lil Mosè u ’l Aron dwar ulied Iżrael u l-Fargħun, sultan tal-Eġittu, u ordnalhom biex joħorġu ’l ulied Iżrael mill-art tal-Eġittu.

¹⁴Dawn huma l-kapijiet ta’ djar missirijiethom: ulied Ruben, l-iben il-kbir ta’ Iżrael: Ħenok u Pallu, Ħesron u Karmi; dawn huma l-familji ta’ Ruben.

¹⁵Ulied Simgħon: Ġamwel u Ġamin u Aħod, u Ġakin u Soħar, u Sawl bin il-Kangħanija. Dawn huma l-familji ta’ Simgħon.

¹⁶U dawn huma l-ismijiet ta’ wlied Levi skont in-nisel tagħhom: Gersum u Keħat u Merari; u Levi għex mija u sebgħa u tletin sena.

¹⁷Ulied Gersum: Libni u Semgħi bil-familji tagħhom.

¹⁸U ulied Keħat: Għamram u Isħar u Ħebron u Għużżijel. Keħat għex mija u tlieta u tletin sena.

¹⁹Ulied Merari: Maħli u Musi. Dawn huma l-familji ta’ Levi skont in-nisel tagħhom.

²⁰Għamram iżżewweġ lil Ġokebed, lil oħt missieru, u wilditlu lil Aron u ’l Mosè. Għamram għex mija u sebgħa u tletin sena.

²¹Ulied Isħar: Koraħ u Nefeg u Żikri.

²²Ulied Għużżijel: Misael u Elisafan, u Sitri.

²³Aron iżżewweġ lil Elisaba, bint Għamminadab, oħt Naħson, u wilditlu ’l Nadab, ’l Abiħu, ’l Elgħażar, u ’l Itamar.

²⁴Ulied Koraħ: Assir u Elkana u Abijasaf; dawn huma l-familji tal-Koraħin.

²⁵Elgħażar, bin Aron, iżżewweġ lil waħda mill-bniet ta’ Putijel, u wilditlu ’l Fineħas. Dawn huma l-kapijiet tal-familji ta’ missirijiet il-Leviti, skont il-familji tagħhom.

²⁶Dawn huma Aron u Mosè li l-Mulej qalilhom: “Oħorġu lil ulied Iżrael mill-art tal-Eġittu bil-qtajja’ tagħhom.”

²⁷Kienu huma li tkellmu quddiem il-Fargħun, is-sultan tal-Eġittu, biex joħorġu lil ulied Iżrael mill-Eġittu: Mosè u Aron.

²⁸Dakinhar li l-Mulej kellem lil Mosè fl-art tal-Eġittu,

²⁹il-Mulej qal lil Mosè: “Jiena Jaħweh: għid lill-Fargħun kulma jien se ngħidlek.”

³⁰U Mosè wieġeb quddiem il-Mulej: “Hawn jien, jien m’għandix xufftejja maħtuna, u kif jisma’ minni l-Fargħun?”