Read Maltese Bible with DC – IL-BIBBJA IL-KOTBA MQADDSA ĠOB 1 Bible Online

ĠOB 1 - Maltese Bible with DC – IL-BIBBJA IL-KOTBA MQADDSA bible

ĠOB 1

¹Kien hemm raġel fl-art ta’ Għus[1] jismu Ġob[2], raġel perfett u tajjeb, jibża’ minn Alla[3] u mbiegħed mill-ħażen.

²Tweldulu seba’ subien u tlitt ibniet.

³L-imrieħel tiegħu kienu jgħoddu sebat elef nagħġa, tlitt elef ġemel, ħames mitt żewġ barrin, ħames mitt ħmara u kotra kbira ta’ qaddejja. Dar-raġel kien l-aqwa wieħed fost il-popli kollha tal-Lvant[4].

⁴Uliedu s-subien kienu jmorru għal ikla li kull wieħed, fil-jum li jmissu, kien jagħmel f’daru. Kienu jistiednu wkoll lit-tliet ħuthom bniet biex jieklu u jixorbu magħhom.

⁵U kull meta kienet tgħaddi dawra sħiħa ta’ festi, Ġob kien jibgħat għalihom biex jagħmlilhom ir-rit tal-purifikazzjoni tagħhom. L-għada kien iqum kmieni u joffri sagrifiċċju ta’ vittmi maħruqa għal kull wieħed minnhom, għax Ġob kien jgħid: “Għandu mnejn dinbu wliedi u seħtu lil Alla f’qalbhom.” Hekk kien soltu jagħmel Ġob.

⁶Ġara darba li wlied Alla resqu quddiem il-Mulej, u fosthom ġie wkoll ix-Xitan[5].

⁷U l-Mulej staqsa lix-Xitan: “Mnejn inti ġej?” Ix-Xitan wieġeb lill-Mulej u qallu: “Minn dawra mad-dinja, kont nitlajja ’l hawn u ’l hemm.”

⁸Il-Mulej raġa’ staqsa lix-Xitan: “Il-qaddej tiegħi Ġob ħsibt fih? Ma hawnx ieħor bħalu fid-dinja, raġel perfett u tajjeb, jibża’ minn Alla u mbiegħed mill-ħażen.”

⁹Ix-Xitan wieġeb u qal: “Tgħid għal xejn Ġob jibża’ minn Alla?

¹⁰Forsi int ma bnejtx ħajt madwaru u madwar daru, u madwar kulma għandu kif iddur? Berikt kulma għamlu idejh, u ġidu kotor mal-art kollha kemm hi.

¹¹Imma midd idek u olqot kulma għandu, u tara jekk jisħtekx f’wiċċek.”

¹²U l-Mulej wieġeb lix-Xitan: “Ara, kulma għandu f’idejk. Biss terfax idek fuqu.” U x-Xitan telaq minn quddiem il-Mulej.

¹³Mela darba wlied Ġob, subien u bniet, kienu qegħdin jieklu u jixorbu l-inbid għand ħuhom il-kbir.

¹⁴U ġie għand Ġob messaġġier jgħidlu: “Il-gniedes kienu jaħartu, bil-ħmir jirgħu ħdejhom:

¹⁵qabżu fuqhom is-Sabijin[6] u ħatfuhom, u lill-qaddejja darbuhom b’xifer is-sejf. Bqajt jien waħdi biex ngħarrfek b’dan.”

¹⁶Kien għadu ma waqafx jitkellem dan, meta ġie ieħor jgħidlu: “Niżel nar ta’ Alla mis-sema, ħaraq l-imrieħel u l-qaddejja, u belagħhom. Bqajt jien waħdi biex ngħarrfek b’dan.”

¹⁷Kif kien għadu jitkellem, ġie ieħor jgħidlu: “Il-Kaldin niżlu fi tliet ġemgħat, u nxteħtu fuq l-iġmla u ħatfuhom, u lill-qaddejja darbuhom b’xifer is-sejf. Bqajt jien waħdi biex ngħarrfek b’dan.”

¹⁸Kif kien għadu jitkellem, ġie ieħor jgħidlu: “Uliedek, subien u bniet, kienu qegħdin jieklu u jixorbu l-inbid għand ħuhom il-kbir,

¹⁹u dlonk qam riħ qawwi min-naħa tad-deżert, u ħabat għad-dar min-naħa tal-erba’ kantunieri tagħha u waqgħet fuq iż-żgħażagħ u mietu. Bqajt jien waħdi biex ngħarrfek b’dan.”

²⁰Imbagħad Ġob qam, ċarrat ħwejġu, qaxxar rasu, niżel wiċċu fl-art u beda jsalli u jgħid:

²¹“Għeri ħriġt minn ġuf ommi, għeri nerġa’ mmur hemm. Il-Mulej tani, il-Mulej ħadli: ikun imbierek isem il-Mulej.”

²²F’dan kollu Ġob ma dinibx u xejn ma ħadha kontra Alla.