Read Maltese Bible with DC – IL-BIBBJA IL-KOTBA MQADDSA ĠOB 10 Bible Online

ĠOB 10 - Maltese Bible with DC – IL-BIBBJA IL-KOTBA MQADDSA bible

ĠOB 10

¹“Ladarba ħajti nistmellha, irrid niftaħ il-bieb għat-tgemgim tiegħi, inferragħ l-imrar ta’ ruħi.

²Ngħid lil Alla: “Tikkundannanix, urini l-għala għandek għalija.

³Hu sewwa għalik li tagħsarni, li tmaqdar xogħol idejk, u tgħin il-ħsibijiet tal-ħżiena?

⁴Għandek int għajnejn tal-laħam, jew tħares kif iħarsu l-bnedmin?

⁵Hu għomrok qasir bħal għomor il-bniedem, u jgħaddu bħal jiemu sninek?

⁶Int, li tgħarrex għan-nuqqas tiegħi u tfittixli d-dnub tiegħi,

⁷int taf tajjeb li jien bla ħtija, u li ħadd minn taħt idejk ma jeħlisni.

⁸Kienu jdejk li sawruni u għamluni; issa bdielek u trid teqridni?

⁹Ftakar li għamiltni bħal mit-tafal, u li lejn it-trab għad treġġagħni.

¹⁰Mhux bħall-ħalib sawwabtni u bħall-baqta għaqqadtni,

¹¹bil-ġilda u l-laħam libbistni, u nsiġtni bl-għadam u bl-għeruq?

¹²Ħajja tajtni u favuri għamilt miegħi, u l-providenza tiegħek ħarsitli ruħi.

¹³Iżda ħbejt xi ħaġa f’qalbek; issa naf li din kellek f’moħħok.

¹⁴Jekk nidneb, int tkun għassa tiegħi biex ma tħallix għaddejja l-ħtija tiegħi.

¹⁵Jekk ninstab ħati, ħażin għalija, jekk bla ħtija, lanqas nerfa’ rasi, miksi bl-għajb u mgħargħar fin-niket.

¹⁶Jekk nerfa’ rasi, qisek iljun toħroġ għalija u qawwietek terġa’ turi fuqi.

¹⁷Iġġedded kontrija l-ġlied tiegħek, u l-għadab iżżid kontrija, bi qtajja’ ġodda jitqabdu miegħi.

¹⁸Għalfejn mela ħriġtni mill-ġuf? Messni mitt bla ma għajn qatt ratni;

¹⁹messni kont qisni qatt ma kont; meħud dritt mill-ġuf għall-qabar.

²⁰Mhux ħaġa żgħira huma jiem ħajti? Erħini, mela, ħa nduq ftit l-hena,

²¹qabel ma mmur u ma niġix lura, lejn art id-dlam u d-dellijiet,

²²art imgħargħra fis-swied u t-taħwid, fejn id-dawl hu nnifsu dlam.”