Read Maltese Bible with DC – IL-BIBBJA IL-KOTBA MQADDSA ĠOB 11 Bible Online

ĠOB 11 - Maltese Bible with DC – IL-BIBBJA IL-KOTBA MQADDSA bible

ĠOB 11

¹Imbagħad wieġeb Sofar in-Nagħmi u qal:

²“Se jitħalla bla tweġiba dan il-lablabi? Jaqaw min jgħid ħafna jieħu raġun?

³Taħseb int li se jsikket in-nies tpaċpiċek? Se tibqa’ żżeblaħ u ma jċanfrek ħadd?

⁴Int tgħid: ‘Safi t-tagħlim tiegħi, bla ħtija jien quddiem Alla.’

⁵Mhux li kien jitkellem Alla u jiftaħ miegħek fommu!

⁶Li kien jurik il-misteri ta’ għerfu, li huma tqal biex tifhimhom, kont tagħraf kemm iħallsek inqas milli ħaqqu dnubek!

⁷Taħseb inti li se tikxef il-misteru ta’ Alla, jew tilħaq it-tarf ta’ Xaddaj?

⁸Hu ogħla mis-smewwiet: kif se tilħqu? Hu aktar fond mill-Qiegħ: x’taf int bħalek?

⁹Jgħaddiha l-art minn tulu, u l-baħar mill-wisa’ tiegħu.

¹⁰Jekk jiġi jaqbad u jarresta ’l xi ħadd u għall-ħaqq isejjaħlu, min iżommu?

¹¹Hu jaf min huma l-bnedmin qarrieqa, jara l-ħażen u jiżnu sewwa.

¹²Iżda l-iblah idaħħal f’moħħu meta l-ħmar selvaġġ jitwieled mans.

¹³Jekk iddawwar lejn Alla qalbek, u tiftaħ lejh idejk;

¹⁴jekk tbiegħed minn idejk il-ħażen, u ma tħallix jgħammar id-dnewwa f’darek,

¹⁵tkun tista’ terfa’ wiċċek bla mistħija, tkun fis-sod u ma jkollokx mniex tibża’.

¹⁶Għax int tinsieh in-niket tiegħek, jew tiftakru bħal ilma li għadda.

¹⁷Aktar mid-dawl ta’ nofsinhar tkun tiddi ħajtek; għalik id-dlam ikun bħas-sebħ.

¹⁸Moħħok mistrieħ għall-ġejjieni tiegħek, hemm x’jagħmillek tajjeb u torqod fil-kwiet.

¹⁹Timtedd u ħadd ma jqajmek, u ħafna jżiegħlu bik.

²⁰Iżda l-ħżiena jinfnewlhom għajnejhom, ma jkollhomx aktar fejn jagħtu rashom, il-mewt biss it-tama tagħhom.”