Read Maltese Bible with DC – IL-BIBBJA IL-KOTBA MQADDSA ĠOB 13 Bible Online

ĠOB 13 - Maltese Bible with DC – IL-BIBBJA IL-KOTBA MQADDSA bible

ĠOB 13

¹“Iva, dan kollu rawh għajnejja; semgħuh widnejja u fehmuh sewwa.

²Dak li tafu intom nafu jiena wkoll, xejn ma jiena inqas minnkom.

³Iżda ma’ Xaddaj ridt kieku nitkellem, ma’ Alla nixtieq niddiskuti.

⁴Għax intom qerq tafu tinsġu, tobba ta’ ħabba lkoll intom.

⁵Mhux li kontu tisktu għalkollox! Hekk, iva, turu għerfkom.

⁶Isimgħu, nitlobkom, l-argument tiegħi, iftħu widnejkom għad-difiża ta’ fommi.

⁷Tridu intom titkellmu għal Alla bil-gideb, taqbżu għalih bit-tagħwiġ?

⁸U tassew li intom iżżommu miegħu, u qed tiddefendu l-kawża tiegħu?

⁹Se tgħadduha lixxa jekk jiġi jgħarbilkom? Jew tqarrqu bih kif jitqarraq bniedem?

¹⁰Oqogħdu żguri li bl-aħrax jeħodkom, jekk bil-moħbi timxu bil-partit.

¹¹Ma jwerwirkomx forsi l-kobor tiegħu, u jkexkixkom il-biża’ li jġibilkom?

¹²Iva, il-qwiel tagħkom huma qwiel tat-trab, u t-tweġib tagħkom tweġib tat-tafal.

¹³Isktu, mela, ħalluni ngħid tiegħi, ħa jiġrili mbagħad li jrid.

¹⁴Ħa nieħdu jiena laħmi bejn snieni, u ħajti nqegħedha f’idejja[19].

¹⁵Ħa joqtolni ’k irid, m’iniex se nitkexkex, imma niddefendi l-kawża tiegħi quddiemu.

¹⁶U dan ikunli r-rahan tar-rebħa, li wieħed ħażin anqas jersaq quddiemu.

¹⁷Isimgħu sewwa x’irrid ngħid, agħtu widen għall-istqarrija tiegħi.

¹⁸Araw, ħejjejt il-kawża tiegħi, naf li noħroġ ħieles.

¹⁹Min hu li se jiġi jmerini? Kieku niskot u nistenna l-mewt.

²⁰Biss nitlob, O Alla, żewġ favuri, biex minn quddiemek ma ninħebiex:

²¹Warrab minn fuqi idek, u bi driegħek twerwirnix.

²²Sejjaħli mbagħad u jiena nwieġeb, jew nitkellem jien u int weġibni.

²³Kemm huma dnubieti u ħtijieti? Urini fejn dnibt u x’għamilt ħażin?

²⁴Għaliex taħbi wiċċek minni, u tqisni għadu tiegħek?

²⁵Trid int tbażża’ werqa niexfa, u tagħmel għal wara sifja?

²⁶Għax ħwejjeġ ta’ mrar tikteb fuq ismi, u twaħħalni bid-dnubiet ta’ żgħożiti;

²⁷tqegħedli fiċ-ċipp riġlejja, titkixxef il-passi kollha tiegħi u tqis il-marki li jħallu saqajja!