Read Maltese Bible with DC – IL-BIBBJA IL-KOTBA MQADDSA ĠOB 14 Bible Online

ĠOB 14 - Maltese Bible with DC – IL-BIBBJA IL-KOTBA MQADDSA bible

ĠOB 14

¹“Il-bniedem imwieled minn mara għandu ħajja qasira, imma tbatija għandu biżżejjed.

²Bħal warda, jiftaħ u mbagħad jidbiel, u jaħrab bħal dell li ma jiqafx. Jintemm bħal[20] għuda msewsa, bħal ilbies mikul mill-kamla.

³U fuq dan jixraqlek iżżomm għajnejk miftuħa u ssejjaħlu quddiemek għall-ħaqq?

⁴Xi ħadd, mela, jista’ jislet is-safi mill-imniġġes? Ħadd!

⁵La darba jiemu magħdudin, la darba l-għadd tax-xhur qiegħed f’idejk, u ħażżiżtlu tarf li ma jistax jaqbżu,

⁶warrab għajnejk minn fuqu, u ħallih itemm il-jum tiegħu bħal ħaddiem mikri.

⁷Siġra għallinqas għandha tama, li jekk tinqata’ terġa’ ttella’, u ma jiġux nieqsa ż-żraġen tagħha.

⁸Imqar jixjieħu fl-art għeruqha, u jinxef fit-trab iz-zokk tagħha,

⁹kif tħoss l-ilma terġa’ tarmi, u tagħmel il-friegħi bħal xitla ġdida.

¹⁰Iżda l-bniedem imut u jispiċċa; xħin toħroġ ruħu fejn ikun?

¹¹Bħalma jinxtorob l-ilma mill-baħar, jew tinxef xmara u titqaxqax,

¹²hekk il-bniedem li jmut, ma jqumx aktar, sa ma jintemmu s-smewwiet ma jistenbaħx, le, ma jqumx mir-raqda tiegħu.

¹³Mhux li kont taħbini f’Art l-Imwiet fejn nistkenn sa ma tibred il-korla tiegħek u tiffissali żmien li tiftakar fija.

¹⁴Li kien jista’ bniedem imut u jerġa’ għall-ħajja, iż-żmien kollu tas-servizz tiegħi kont nissaporti sa ma jasal il-waqt tal-bidla tiegħi.

¹⁵Kont tgħajjatli u jiena nwieġbek, kont titgħaxxaq bl-opra ta’ jdejk.

¹⁶Ma kontx tgħoddli l-passi tiegħi, lanqas tgħassisli għal dnubieti,

¹⁷kont tissiġilla f’sorra l-ħtija tiegħi[21], u tiksi bil-ġir il-ħżunija tiegħi.

¹⁸Bħalma tittiekel muntanja u tiġġarraf u jitqanqal minn postu l-blat,

¹⁹bħalma jiekol l-ilma l-ġebel, u jiknes l-għargħar il-ħamrija, hekk int ixxejjen it-tama tal-bniedem.

²⁰Int iżżarmah u hu jitlaq għalkollox, tħassarlu surtu u tibagħtu.

²¹Jekk jiksbu ġieħ uliedu, hu ma jkunx jaf, jekk jaqgħu fl-għajb, lanqas jintebaħ.

²²Għalih biss ibati ġismu, għalih waħdu titniehed ruħu.”