Read Maltese Bible with DC – IL-BIBBJA IL-KOTBA MQADDSA ĠOB 16 Bible Online

ĠOB 16 - Maltese Bible with DC – IL-BIBBJA IL-KOTBA MQADDSA bible

ĠOB 16

¹Ġob wieġeb u qal:

²“Ħwejjeġ bħal dawn ili ħafna nisma’, farraġa msejkna intom ilkoll.

³M’hemmx li jintemm dan il-kliem fieragħ? U int x’inhu jġagħlek tibqa’ tgħid tiegħek?

⁴Jien kont naf nitkellem bħalkom, kieku intom kontu minfloki; bi kliemi kont nordomkom, u nħarrek għalikom rasi;

⁵b’li ngħidilkom kont nirfidkom, u ma nehdiex inħarrek xufftejja.

⁶Ukoll jekk nitkellem ma jittaffiex hemmi, u jekk niskot mhux se jgħaddili.

⁷Għax issa fnieni dak li għandu għalija, il-ġemgħa tiegħu kollha qabdet fija.

⁸Sar xhud u qam kontrija, dak li infamani jixlini f’wiċċi,

⁹Iħebb għalija l-għadab ta’Alla u jbiċċirni, jgħażgħaż għalija snienu, u jħares lejja biċ-ċiera.

¹⁰Fetħu mbagħad ħalqhom kontrija, bi tkasbir tawni bil-ħarta, ngħaqdu għalenija kontra tiegħi.

¹¹Alla telaqni f’idejn min jagħmel il-ħażen, iva f’idejn il-ħżiena rħieni.

¹²Kont ngħix bi kwieti u għarraqni, qabadni minn għonqi u għafasni, ħadni b’mira tal-wadab tiegħu.

¹³Dawwarni minn kull naħa bil-vleġeġ tiegħu, qattagħli bla ħniena l-ġewwieni tiegħi, u ħariġli għal fuq l-art imsarni.

¹⁴B’xaqq fuq ieħor qasamni, bħal gwerrier intafa’ fuqi.

¹⁵Ħitt xkora madwar ġildi, u għaddast rasi fit-trab.

¹⁶Minfuħ wiċċi bid-dmugħ, mgħammxin il-ħbub t’għajnejja,

¹⁷għalkemm bl-ebda dnewwa ma ċċappsu jdejja, u t-talba tiegħi hi sinċiera.

¹⁸O art, la tgħattix id-demm tiegħi[22], biex ma tindifinx l-għatja tiegħi.

¹⁹“Iva, imqar issa għandi xhud fis-sema[23], hemm fil-għoli min jaqbeż għalija.

²⁰Ifisser hu ħsibijieti quddiem Alla li lejh nerfa’ għajnejja bil-biki

²¹u jkun l-imħallef bejn bniedem u Alla bħalma jsir bejn bniedem u għajru.

²²“Jgħaddu s-snin magħduda ta’ ħajti, u naqbad it-triq li ma nerġax lura minnha.