Read Maltese Bible with DC – IL-BIBBJA IL-KOTBA MQADDSA ĠOB 17 Bible Online

ĠOB 17 - Maltese Bible with DC – IL-BIBBJA IL-KOTBA MQADDSA bible

ĠOB 17

¹Ruħi mifnija, ħajti fix-xifer, u l-qabar jistennieni.

²M’għandix ħdejja ħlief żeblieħa, u għajni tishar qalb it-tinbix tagħhom.

³Żommli għandek ir-rahan tiegħi, għax min inkella se jagħtini idu?

⁴Lil ħbiebi int qtajtilhom il-fehma, għalhekk ma tħallihomx jittrijunfaw.

⁵Jistiednu l-ħbieb biex jaqsmu l-wirt magħhom, waqt li għajnejn uliedhom mifnija jixxennqu.

⁶Iżda Hu ġiebni fi lsien in-nies, jien hu dak li jobżqulu f’wiċċu.

⁷Tgħammxuli bin-niket għajnejja, saru bħal dell idejja u riġlejja.

⁸Jistagħġbu b’dan it-tajbin, jitmasħan il-ġust għall-ħażin.

⁹Iżda l-ġust iżomm sħiħ fl-imġiba tiegħu, jissokta jitqawwa dak ta’ jdejh safja.

¹⁰Erġgħulha, mela, ejjew ilkoll, żgur ma nsibx fostkom wieħed għaref.

¹¹Għosfru jiemi bil-proġetti tiegħi, ġew fix-xejn ix-xewqat ta’ qalbi.

¹²Il-lejl ħbiebi jagħmluh nhar, jgħidu ‘Qrib id-dawl’ ġo wiċċ id-dlam.

¹³Jekk nistenna l-Imwiet b’għamara tiegħi, u fid-dlam ta’ taħt l-art nifrex soddti,

¹⁴jekk ngħid lill-qabar ‘missieri int’, u lid-dud ‘ommi jew oħti’,

¹⁵fejn hi, mela, it-tama tiegħi? U t-tama tiegħi min se jaraha?

¹⁶Lejn bwieb l-Imwiet hi tinżel, xħin flimkien nindifnu fit-trab.”