Read Maltese Bible with DC – IL-BIBBJA IL-KOTBA MQADDSA ĠOB 19 Bible Online

ĠOB 19 - Maltese Bible with DC – IL-BIBBJA IL-KOTBA MQADDSA bible

ĠOB 19

¹Ġob wieġeb u qal:

²“Kemm se ddumu tkidduni, u bi kliemkom tagħsruni?

³Għaxar darbiet s’issa żeblaħtuni, u xejn ma stħajtu tkagħbruni.

⁴Nagħmluha li tassew għawwiġt triqti, se jbejjet b’daqshekk l-iżball fija?

⁵Intom tieħdu r-riħ fuqi, għax twikkuli bi ħtija l-għajb li għandi.

⁶Kunu afu li Alla hu li qalibhieli, hu li xeħet madwari x-xibka tiegħu.

⁷Ngħajjat: ‘Moħqrija!’ u ħadd ma jweġibni, nittallab l-għajnuna u ma ssirlix ġustizzja.

⁸Alla għalaqli t-triq biex ma ngħaddix, firixli d-dlam fuq il-mogħdija.

⁹Neżżagħli l-ġieħ tiegħi, neħħieli l-kuruna minn fuq rasi.

¹⁰Ġarrafni għalkollox u ġejt fix-xejn, qalagħli bħal siġra t-tama tiegħi.

¹¹Kebbes għalija l-korla tiegħu, u żammni b’għadu tiegħu.

¹²Ingħaqdu flimkien il-qtajja’ tiegħu, qabdu għal fuqi triqthom u waqqfu l-kamp madwari.

¹³Ħadli ’l ħuti ’l bogħod minni. Ħbiebi saruli barranin.

¹⁴Għebu qrabati u l-ħbieb tal-qalba, dawk li kont nilqa’ f’dari nsewni.

¹⁵San-nisa li jaqduni jżommuni bi frustier, sirt għalihom bħal wieħed barrani.

¹⁶Insejjaħ lill-qaddej tiegħi u ma jweġibx, għalkemm jiena nitolbu b’fomm il-ħniena.

¹⁷Nifsi jqażżeż lil marti, sirt ninten għal nies dari.

¹⁸Iż-żgħar imqarqċin ukoll jistmerruni, jgħadduni biż-żmien kif nidher quddiemhom.

¹⁹Il-ħbieb tal-qalb ilkoll jistkerrhuni, dawk li ħabbejt daru kontrija.

²⁰Leħni dab, sirt għadma u ġilda, bilkemm baqagħli ġilda ma’ ħnieki.

²¹Ħennu għalija, ħennu għalija intom, ħbiebi għax id Alla laqtitni.

²²Għaliex tagħmlu għalija bħal Alla, u minn laħmi ma tixbgħu qatt?

²³Kemm nixtieq li kliemi jinkiteb, kemm nixtieq li jitnaqqax fil-bronż,

²⁴jew b’xafra tal-ħadid u b’mili taċ-ċomb jitniżżel għal dejjem fil-blat!

²⁵Jien naf li d-Difensur tiegħi ħaj[26] u fl-aħħar fuq it-trab iqum,

²⁶u wara li jintemm ġildi, għoddni bla laħam, nara ’l Alla[27].

²⁷Lilu narah b’ħabib tiegħi, Dak li jilmħu għajnejja ma jkunlix barrani! Qed iddub qalbi ġo fija …

²⁸La qed tgħidu: ‘Kif se nagħmlu għalih?’, u ‘Fih tinsab il-kawża ta’ li ġralu’,

²⁹ngħidilkom: ‘Ibżgħu mis-sejf lest għalikom għax b’korla għall-ħtijiet is-sejf jiġi, u tkunu tafu li hemm Imħallef.’ ”