Read Maltese Bible with DC – IL-BIBBJA IL-KOTBA MQADDSA ĠOB 20 Bible Online

ĠOB 20 - Maltese Bible with DC – IL-BIBBJA IL-KOTBA MQADDSA bible

ĠOB 20

¹Qabeż jitkellem Sofar in-Nagħmi, u qal:

²“Ara, qabbżuni mill-ġdid ħsibijieti, u t-tqanqil ta’ ruħi ġo fija.

³Għax kif nisma’ ċanfirek iregħexni, l-ispirtu ġo fija jġagħalni nwieġbek.

⁴Taf xejn int li minn dejjem, mindu deher fid-dinja l-bniedem,

⁵it-trijonf tal-ħżiena ħajtu qasira, u l-ferħ ta’ bin id-dnewwa jdum waqt wieħed?

⁶Imqar tilħaq sas-sema kburitu, u rasu tmiss is-sħab,

⁷bħall-ħmieġ ta’ ġo msarnu jintrema għal dejjem, u jgħid min kien jafu: ‘Fejn hu?’

⁸Jgħib bħal ħolma u ħadd ma jsibu, bħall-fantażmi tal-lejl jitħarrab.

⁹L-għajn li kienet tarah ma tilmħux aktar, lanqas ma tibqa’ tafu daru.

¹⁰Uliedu jittallbu bħal foqra għax kellu jrodd il-ġid tiegħu.

¹¹Għadmu mimli biż-żgħożija, miegħu fit-trab jimtedd.

¹²Għalkemm jiġih ħelu l-ħażen f’ħalqu, u joqgħod ilebbtu bi lsienu;

¹³għalkemm idewmu u ma jħallihx jinżel, u f’nofs ħalqu jżommu tajjeb,

¹⁴dak l-ikel jitħassar fl-istonku tiegħu, isir velenu ta’ lifgħa f’imsarnu.

¹⁵Il-ġid li bala’ jkollu jaqilgħu, iqallagħhulu Alla mill-istonku.

¹⁶Velenu tas-sriep hu reda’, u lsien il-lifgħa joqtlu.

¹⁷Ma jarax aktar il-gliegel taż-żejt[28], lanqas in-nixxigħat tal-għasel u l-ħalib.

¹⁸Irodd kulma kiseb bla ma jistgħallu, mill-ġid li ħażen ma jgawdi xejn,

¹⁹talli għaffeġ il-fqir flok ħa ħsiebu, u seraq djar ħaddieħor flok bena tiegħu.

²⁰Billi qatt ma kienet xebgħana żaqqu, ma jeħilsux il-ġid li rekken.

²¹Billi xejn ma ħarab il-kilba tiegħu, ma jdum xejn ir-risq tiegħu.

²²Fl-aqwa tal-ġid jaħkmuh id-dwejjaq, kull xorta ta’ ħsara tiġi fuqu.

²³Hu u jaħseb biex jimla żaqqu, Alla jimlihielu bin-nar tal-korla tiegħu, u jsawwabhulu sa ġo msarnu.

²⁴Jekk jaħrab mis-sejf tal-ħadid, jilħqu l-qaws tal-bronż.

²⁵Il-vleġġa tinfidlu dahru, il-ponta tleqq toħroġ minn fwiedu, u t-twerwir jaħkimlu qalbu.

²⁶Merfugħin għalih id-dlamijiet kollha, nar li ħadd ma qabbdu jaħarqu u jtemm kulma baqa’ fl-għarix tiegħu.

²⁷Is-smewwiet jikxfulu ħżunitu u l-art tqum kontrih.

²⁸Daru jkaxkarha l-għargħar, l-ilma qawwi li jinżel f’jum il-korla.

²⁹Dan sehem il-ħażin mingħand Alla, dan hu l-wirt li refagħlu Alla.”