Read Maltese Bible with DC – IL-BIBBJA IL-KOTBA MQADDSA ĠOB 21 Bible Online

ĠOB 21 - Maltese Bible with DC – IL-BIBBJA IL-KOTBA MQADDSA bible

ĠOB 21

¹Ġob wieġeb u qal:

²“Isimgħuni, isimgħuni kelma, u jkunli dan il-faraġ tagħkom.

³Stabru bija, ħalluni nitkellem, u xħin nispiċċa ddieħku kemm tridu.

⁴Jewwilla ma’ bniedem li għandi xi ngħid jien? M’għandix forsi għax nitlef sabri?

⁵Araw xi ġrali u għandkom titbikkmu, u tqiegħdu jdejkom fuq fommkom.

⁶Għax jien imqar naħseb biss nibqa’ mnixxef, u taqbadni tkexkixa ma’ ġismi kollu.

⁷L-għala l-ħżiena ħajjithom twila, u kulma jmorru jikbru fis-setgħa?

⁸Imqabbda fis-sod il-familja tagħhom: missirijiethom għadhom magħhom, u wliedhom taħt għajnejhom.

⁹Djarhom fiż-żgur, m’għandhomx minn xiex jibżgħu, mhuwiex fuqhom il-bastun ta’ Alla.

¹⁰Inissel il-barri tagħhom u ma jfallix, tferragħ il-baqra tagħhom u ma tkorrix.

¹¹Jerħu ż-żgħar tagħhom jimirħu bħall-ħrief, u lit-tfal tagħhom jogħxew fiż-żfin.

¹²Jgħannu biċ-ċetra u t-tanburlin, u jixxalaw bid-daqq tal-flawt.

¹³Jgħadduha tajjeb ħajjithom kollha, u jinżlu bis-sliem fl-Imwiet.

¹⁴U dawn qalu ’l Alla: ‘Ħallina bi kwietna, minn triqatek ma jimpurtaniex.

¹⁵X’inhu Xaddaj biex aħna nobduh? X’se ndaħħlu jekk nitolbuh?’

¹⁶M’għandhomx forsi l-ħżiena xortihom f’idejhom għalkemm ħsiebhom imbiegħed minn Alla?

¹⁷Kemm-il darba ntfiet il-lampa tal-ħżiena, jew messithom il-ħsara li ħaqqhom, jew qassmitilhom uġigħ il-korla ta’ Alla?

¹⁸Kemm minnhom saru bħat-tiben mar-riħ, jew bħal sifja maħtufa mir-riefnu?

¹⁹Tgħidu: ‘Alla jerfa’ l-kastig tagħhom għal uliedhom’; le, ngħidilkom, lill-ħati jmissu jagħtih ħalli jitgħallem,

²⁰ħa jaraw għajnejh stess il-kalċi tiegħu, u jixrob huwa nnifsu mill-korla ta’ Xaddaj.

²¹Għax x’jimpurtah minn daru wara mewtu, meta jkun għalaq l-għadd ta’ xhuru?

²²Tgħiduli: ‘Se jgħallem xi ħadd l-għerf lil Alla, Hu li jagħmel ħaqq mill-ogħla ħlejjaq[29]?’

²³Araw: wieħed imut fl-aħjar ta’ saħħtu kollu hieni u kuntent,

²⁴ġenbejh mimlija bis-simna u l-mudullun ta’ għadmu tari.

²⁵Ieħor imut bl-imrar ġo qalbu, mingħajr qatt ma daq xi hena.

²⁶U lkoll xorta fit-trab jimteddu, ’il wieħed u ’l ieħor jiksi d-dud.

²⁷Ara: jiena naf tajjeb ħsibijietkom, x’qegħdin tfasslu biex tonsbuni.

²⁸Se tgħiduli: ‘Fejn hi issa dar il-prinċep? Fejnhom issa l-għamajjar tal-ħżiena?’

²⁹Ngħidilkom: ‘Staqsu ’l dawk li siefru, u tirruftawx it-tagħrif li ġabru.

³⁰Il-ħażin ma jintmessx minn jum il-ħsara, ikun meħlus xħin tiġi l-korla.

³¹Ħadd ma jċanfru f’wiċċu għal imġibtu, ħadd ma jħallsu talli għamel.

³²U xħin imorru bih għad-difna, tmur warajh in-nies bi ħġarha, u timxi quddiemu folla kbira;

³³tagħmillu fuq qabru sahra, u jkunlu ħelu t-trab tal-wied.’

³⁴Kif tridu, mela, tfarrġuni? Bil-frugħa? Mhux gideb biss baqa’ fi tweġibkom?”