Read Maltese Bible with DC – IL-BIBBJA IL-KOTBA MQADDSA ĠOB 22 Bible Online

ĠOB 22 - Maltese Bible with DC – IL-BIBBJA IL-KOTBA MQADDSA bible

ĠOB 22

¹Wieġbu Elifaż it-Temani:

²“Jista’ l-bniedem jiswa lil Alla? Jiswielu għallinqas l-għaref?

³X’se żżidlu ’l Xaddaj bil-ħajja tajba tiegħek? X’se jdaħħal Alla minn imġibtek bla tebgħa?

⁴Jewwilla għat-tjieba tiegħek li Hu jċanfrek u jġibek għall-ħaqq tiegħu?

⁵Mhux għax kbira[30] hi ħżunitek, u ħtijietek ma ssibx tarfhom?

⁶Int ħadt ir-rahan lil ħutek għal xejn b’xejn, u neżżajt għerja lill-imċerċrin.

⁷Int ċħadt l-ilma lill-għajjenin u ma tmajtx lill-imġewħin.

⁸Int għax tiflaħ ksibt l-art, u tgħammar fiha b’rasek merfugħa.

⁹Int bgħatt ir-romol b’idejhom vojta, u sħaqt dirgħajn l-iltiema.

¹⁰Għalhekk tara nases madwarek, u biża’ li jaħkmek għal għarrieda.

¹¹Jew kont taħseb li ma tarax id-dlam, u li ma jgħerrqikx l-għargħar?

¹²Mhuwiex Alla l-Ogħla tas-sema, u jara ras il-kwiekeb li huma fl-għoli?

¹³U int tiġi tgħid: ‘X’jaf Alla? Kif jista’ jiġġudika b’dak is-sħab iswed?

¹⁴Jgħattih is-sħab u ma jħallihx jara, fuq il-ħnejja tas-sema Hu jimxi.’

¹⁵Trid int taqbad it-triq il-mudlama, li għaddew minnha n-nies il-ħżiena,

¹⁶nies li nħatfu qabel żmienhom, meta xmara ġarrfet is-sisien tagħhom?

¹⁷Dawn qalu ’l Alla: ‘Ħallina bi kwietna; x’jista’ jagħmel Xaddaj għalina?’

¹⁸Iżda kien Hu li mela bil-ġid lil djarhom, għad li ħsieb il-ħżiena mbiegħed minnu.

¹⁹Jaraw dan il-ġusti u jifirħu, dawk ta’ bla ħtija jiddieħku u jgħidu:

²⁰‘Ġie fix-xejn il-kobor tagħhom, u l-ġid tagħhom belgħu n-nar.’

²¹Erġa’ lejn Alla, agħmel ħbieb miegħu, u mbagħad ikollok riżq tajjeb.

²²Ilqa’ t-tagħlim ħiereġ minn fommu, u aħżen ġo qalbek kliemu.

²³Jekk iddur lejn Xaddaj terġa’ tintrafa’; jekk tbiegħed minn darek id-dnewwa,

²⁴jekk tarmi fit-trab id-deheb tiegħek, u qalb iċ-ċagħak tal-wied id-deheb fin tiegħek,

²⁵ikun Xaddaj id-deheb tiegħek, u l-ħażniet tal-fidda tiegħek.

²⁶Issib f’Xaddaj l-għaxqa tiegħek u lejn Alla int terfa’ wiċċek.

²⁷Xħin titolbu Hu jagħtik widen, u int troddlu l-wegħdiet tiegħek.

²⁸Kulma trid tagħmel jirnexxilek, għax jiddi d-dawl fuq mogħdijietek.

²⁹Jekk ibaxxuk, għid: ‘Jiġi l-qawmien,’ għax jingħata l-għajnuna min ibaxxi rasu.

³⁰Alla jeħles lil kull min hu bla ħtija, u int tinħeles għas-safa ta’ jdejk.”