Read Maltese Bible with DC – IL-BIBBJA IL-KOTBA MQADDSA ĠOB 23 Bible Online

ĠOB 23 - Maltese Bible with DC – IL-BIBBJA IL-KOTBA MQADDSA bible

ĠOB 23

¹Ġob wieġeb u qal:

²“Illum ukoll bi rvell se jkun tweġibi, għax idu tħarrax it-tnehid tiegħi.

³Mhux li kont naf fejn insibu, jew xi triq nieħu lejn it-tron tiegħu!

⁴Kont irressaq quddiemu l-kawża tiegħi b’kotra ta’ raġunijiet lesti fuq fommi,

⁵u nkun naf xi tweġib għandu għalija, u nifhem dak li jrid jgħidli.

⁶Jaqaw b’wiri ta’ saħħa jitlewem miegħi? Le! Imma aktar naħseb li joqgħod jismagħni.

⁷Hemm jista’ l-ġust jirraġuna miegħu, u jien nirbaħ żgur il-kawża tiegħi.

⁸Jekk immur lejn il-Lvant Hu mhux hemm, jekk lejn il-Punent anqas ma nilmħu.

⁹Indur lejn it-Tramuntana u ma nsibux, nilwi lejn in-Nofsinhar u lanqas ma narah hemm.

¹⁰Għax Hu jaf sewwa l-mixi ta’ riġlejja, jekk jgħarbilni niddi bħad-deheb.

¹¹Riġli żamm sħiħ fuq il-passi tiegħu, ħarist triqtu u ma ġġennibtx minnha.

¹²Ma warrabtx il-kmandamenti ta’ xufftejh, għożżejt f’qalbi d-digrieti ta’ fommu.

¹³Iżda Hu qatagħha, min se jreġġgħu lura? Dak li jrid jagħmlu.

¹⁴Hu jtemm is-sentenza li qatagħli, u ħafna oħrajn li għandu f’moħħu.

¹⁵Għalhekk nitkexkex quddiemu, u mqar naħseb biss nibża’ minnu.

¹⁶Alla mewwitli qalbi, Xaddaj werwirni.

¹⁷Għax ninsab imxekkel mid-dlam, u miksi kollni miċ-ċpar.