Read Maltese Bible with DC – IL-BIBBJA IL-KOTBA MQADDSA ĠOB 24 Bible Online

ĠOB 24 - Maltese Bible with DC – IL-BIBBJA IL-KOTBA MQADDSA bible

ĠOB 24

¹“L-għala Xaddaj[31] iżomm moħbija ż-żminijiet[32], u dawk li jħobbuh ma jarawx jiem il-ħaqq?

²Il-ħżiena jneħħu s-sinjali ta’ qsim l-għelieqi, jisirqu l-imrieħel u jirgħuhom huma.

³Jieħdu l-ħmar tal-iltim, u jżommu b’rahan il-barri tal-armla.

⁹Jaħtfu l-iltim minn sider ommu u jżommu b’rahan it-tifel tal-fqir. Ikeċċu mit-triq tagħhom l-imsejkna, u l-fqar tal-pajjiż ikollhom jinħbew. Bħal ħmir fix-xagħri joħorġu jitħabtu ħa jsibu l-ikel tagħhom, ix-xagħri jitmgħalhom ’l uliedhom. Jaħsdu għelieqi li mhumiex tagħhom, ilaqqtu mid-dwieli tal-għonja. Jgħaddu l-lejl għerja mingħajr għata, m’għandhomx ilbies x’jilqgħalhom il-ksieħ. Jixxarrbu għasra bix-xita tal-muntanji, jitrekknu mal-blat għax m’hemmx fejn jistkennu.

¹⁰Jiġġerrew għerja mingħajr ilbies, imorru bil-ġuħ bil-qatet f’idejhom.

¹¹Jisħqu fil-magħsar iż-żebbuġ, jagħsru l-għeneb, u mejta bil-għatx.

¹²Fil-belt jokorbu dawk li qed imutu, griżmejn il-feruti jgħajtu għall-għajnuna, u Alla ma jagħtix kas tat-talba tagħhom.

¹³Hemm uħud li rvillaw għad-dawl, li ma jridux jafu bi triqatu u f’mogħdijietu ma jżommux.

¹⁴Iqum qabel jisbaħ l-assassin, biex joqtol il-fqir u l-imsejken. Billejl iħuf il-ħalliel,

¹⁶jiżgassa d-djar fis-satra tad-dlam. Iż-żieni wkoll jistenna d-dlam, jgħid lilu nnifsu: “Ħadd ma jarani”, u jqiegħed maskra ma’ wiċċu. Binhar jinqaflu ġewwa dawn li ma jridux jafu bid-dawl.

¹⁷Għalihom ilkoll dlam hi l-għodwa, malli jisbaħ jaqbadhom il-biża’.

²⁵Jekk mhux hekk min ġej igiddibni, u jġib fix-xejn l-argument tiegħi?”