Read Maltese Bible with DC – IL-BIBBJA IL-KOTBA MQADDSA ĠOB 26 Bible Online

ĠOB 26 - Maltese Bible with DC – IL-BIBBJA IL-KOTBA MQADDSA bible

ĠOB 26

¹Wieġeb Ġob u qal:

²“M’hawnx għalik kemm tgħinu lid-dgħajjef, kemm taf issaħħu d-driegħ mitruħ!

³Kemm tagħtih parir lill-injurant, u hekk turi kemm tinqala’!

⁴Iżda għal min fhimt tgħidu kliemek? Ta’ min hu l-ispirtu li webblek?”

⁵“Jirtogħdu fil-qiegħ l-erwieħ tal-mejtin, il-baħar u kulma jgħammar fih.

⁶Mikxuf quddiemu l-Imwiet, xejn ma jistorlu Art it-Telfien.

⁷Hu jifrex fuq il-vojt tas-smewwiet, iżomm l-art imdendla fuq ix-xejn.

⁸Jagħlaq l-ilma fis-sħab tiegħu, u ma jinfaqax is-sħab bit-toqol tiegħu.

⁹Hu jgħatti wiċċ il-qamar mimli, jifrex fuqu s-sħaba tiegħu.

¹⁰Ħażżeż ċirku fuq wiċċ il-baħar, fejn jinferaq id-dawl mid-dlam.

¹¹Il-kolonni tas-sema jirtogħdu, jitwerwru biċ-ċanfir tiegħu.

¹²Bil-qawwa ta’ driegħu sikket il-Baħar, bil-ħila ta’ moħħu saħaq lil Raħab[35].

¹³B’nifsu jiċċaraw is-smewwiet, idu tinfed is-serp ħafif.

¹⁴Dawn biss intietef ta’ qawwietu, tfesfisa dgħajfa li nisimgħu fuqu! Min jifhmu, mela, r-ragħad ta’ setegħtu?”