Read Maltese Bible with DC – IL-BIBBJA IL-KOTBA MQADDSA ĠOB 27 Bible Online

ĠOB 27 - Maltese Bible with DC – IL-BIBBJA IL-KOTBA MQADDSA bible

ĠOB 27

¹Ġob issokta jitkellem u qal:

²“Naħlef b’Alla l-ħaj, li ċaħħadni mid-dritt tiegħi, b’Xaddaj li mela bl-imrar lil ruħi,

³li sakemm iddum il-ħajja fija, u nifs Alla f’imnifsejja,

⁴l-ebda ħażen ma jlissnu xufftejja, anqas gidba ma jgħid ilsieni.

⁵Ma jkun qatt li nagħtikom raġun, insostni sa ma mmut is-sewwa tiegħi.

⁶Inżomm sħiħ mas-sewwa tiegħi u ma nċedix, ma ċċanfarnix il-kuxjenza dwar ħajti.

⁷Ħa jkun magħdud mal-ħżiena l-għadu tiegħi, u ma’ wlied id-dnewwa dak li jmerini.

⁸Għax, x’tama għandu l-ħażin xħin jitqaċċat, meta Alla jeħodlu ħajtu?

⁹Jaqaw jisma’ Alla l-għajjat tiegħu, meta taqa’ fuqu l-ħsara?

¹⁰Isib forsi f’Xaddaj l-għaxqa tiegħu? Isejjaħ hu lil Alla f’kull żmien?

¹¹Ngħallimkom jien dwar il-qawwa ta’ Alla, il-ħsieb li għandu Xaddaj ma naħbihx.

¹²Imma għalfejn? Ilkoll rajtuh dan; l-għaliex, mela, tintilfu fi kliem fieragħ?”

¹³“Ara kif iħallas Alla lill-ħażin, x’wirt jerfa’ Xaddaj għal min jaħqar.

¹⁴Jekk joktor nislu għas-sejf ikun dan, uliedu ma jkollhomx x’jieklu.

¹⁵Dawk li jħalli warajh tidfinhom il-pesta, u r-romol tiegħu[36] ma jibkuhx.

¹⁶Jekk jaħżen bħat-trab il-fidda, u jross bħat-tafal balal ta’ ħwejjeġ,

¹⁷il-ħwejjeġ li rafa’ jilbishom wieħed ġust, u l-fidda jiritha bniedem bla ħtija.

¹⁸Ikun bena daru bħal għanqbuta, bħala għarix li talla’ għassies.

¹⁹Jimtedd għani iżda ma jerġax, xħin jistenbaħ ġidu jkun għosfor.

²⁰It-twerwir ikaxkru bħal għargħar, il-lejl ikaxkru bħal riefnu.

²¹Riħ mil-Lvant jobormu u jġorru, jikinsu mill-għamara tiegħu.

²²Bla ħniena jonfoħ fuqu, hu u jaħrab mill-qabda tiegħu.

²³Iċapċap għalih idu, u bi tvenvina jkaxkru minn postu.”

²⁴Bil-ħeffa jinġarr il-ħażin fuq wiċċ l-ilma, misħut ikun wirtu fuq l-art, ma jaqbadx aktar it-triq lejn id-dwieli.

²⁵Bħalma n-nixfa u s-sħana jixorbu l-ilma tas-silġ, hekk jagħmel l-Imwiet lill-midneb.

²⁶Jinsieh il-ġuf li ġiebu, u ismu ma jiftakrux iżjed; hekk, bħal siġra, jitkisser il-ħażin.

²⁷Hu ħaqar il-mara ħawlija bla nisel, u lill-armla ma tahiex għajnuna.

²⁸Iżda jqum Dak li jaqbad is-setgħana bil-ħila tiegħu, u l-ħażin ma jkunx aktar żgur minn ħajtu.

²⁹Rħielu Alla jixxettel b’tama qarrieqa, iżda għajnejh kienu fuq triqtu.

³⁰Għola għal ftit u m’għadux aktar, intelaq bħal ħaxix mielaħ kif jinqata’, inħasad bħal ras ta’ sbula.