Read Maltese Bible with DC – IL-BIBBJA IL-KOTBA MQADDSA ĠOB 28 Bible Online

ĠOB 28 - Maltese Bible with DC – IL-BIBBJA IL-KOTBA MQADDSA bible

ĠOB 28

¹Iva, għandha l-fidda l-minjiera tagħha[37] u d-deheb il-post fejn jissaffa.

²Jittieħed mit-trab il-ħadid, u r-ram mill-ħaġar imdewweb.

³Jagħmel il-bniedem tarf għad-dlam, sal-qiegħ nett hu jistħarreġ. Fil-blat sewdieni u mdallam

⁴jaqta’ mina ’l bogħod mid-djar. Fi mkejjen minsija mir-riġel jiddendel, imbiegħed min-nies jitbandal.

⁵Dik l-art li minnha joħroġ il-ħobż, minn taħt imqallba bin-nar.

⁶Minjiera taż-żaffir il-ħaġar tagħha, it-trab tagħha fih id-deheb.

⁷It-triq għal hemm l-ebda għasfur tal-ħtif ma jafha, anqas għajn il-bies ma tilmaħha.

⁸Ma jirfsux fuqha l-bhejjem selvaġġi, anqas ma jgħaddi minnha l-iljun.

⁹Il-bniedem imidd idu għall-blata taż-żnied, iqalleb mill-qiegħ il-muntanji.

¹⁰Minn ġol-blat jaqta’ mini, u jaraw għajnejh minn kull ħaġar prezzjuż.

¹¹Iħammel ir-ramel tal-widien, u joħroġ għad-dawl ħwejjeġ moħbija.

¹²Imma l-għerf minn fejn jiġi, u fejn hu postu d-dehen?

¹³Fejn qiegħed l-għerf ma jafx il-bniedem, l-għerf ma jinstabx f’art il-ħajjin.

¹⁴Il-Qiegħ jistqarr: ‘Mhux fija’; il-Baħar jgħid: ‘Mhux għandi’.

¹⁵Bl-ifjen deheb ma jinxtarax, anqas ma jitħallas b’mitqlu fidda.

¹⁶Ma jintiżinx mad-deheb ta’ Ofir, anqas mal-aħjar oniċi jew maż-żaffir.

¹⁷Ma jiswiex daqsu d-deheb u l-ħġieġ, ma jinbidilx ma’ vażun tad-deheb fin.

¹⁸Il-qroll u l-kristall anqas ma nsemmuhom; tikseb l-għerf aqwa mill-ġawhar.

¹⁹It-topaz tal-Etjopja ma jiswiex daqsu, anqas joqgħod ħdejh id-deheb l-aktar fin.

²⁰L-Għerf, mela, minn fejn jiġi? U fejn hu postu d-dehen?

²¹Hu moħbi minn għajnejn il-ħajjin kollha, hu mistur imqar għat-tjur tal-ajru.

²²It-Telfien u l-Imwiet jgħidu: ‘B’widnejna ħadna ħbaru.’

²³Triq l-Għerf Alla biss jagħrafha, Hu biss jafu postu.

²⁴Għax hu jħares lejn truf l-art, u jara taħt is-sema kollu.

²⁵Meta ffissa lir-riħ il-qawwa tiegħu, u qassam bil-qjies l-ilmijiet;

²⁶meta għamel sieqja għax-xita, u triq għall-beraq tar-ragħad,

²⁷dak il-ħin rah u qiesu, stħarrġu għalkollox u wettqu.

²⁸U qal lill-bniedem: ‘Ara, li tibża’ mill-Mulej hu l-għerf, li titbiegħed mill-ħażen, l-għaqal.’