Read Maltese Bible with DC – IL-BIBBJA IL-KOTBA MQADDSA ĠOB 29 Bible Online

ĠOB 29 - Maltese Bible with DC – IL-BIBBJA IL-KOTBA MQADDSA bible

ĠOB 29

¹Ġob raġa’ qabad jitkellem u qal:

²“M’hemmx li nerġa’ għaż-żmien ta’ dari, għall-jiem meta Alla kien iħarisni,

³meta kienet tiddi fuq rasi l-imnara tiegħu, u fid-dawl tiegħu kont nofroq id-dlam!

⁴M’hemmx li nerġa’ għall-aħjar ta’ żmieni, meta Alla l-Għoli waqqaf l-għarix tiegħi,

⁵u Xaddaj kien għadu jġibni u madwari kelli ż-żgħażagħ tiegħi!

⁶Meta kont naħsel saqajja fil-ħalib u l-balzmu, u nferragħ fuq riġlejja gliegel ta’ żejt!

⁷Meta kont noħroġ lejn bieb il-belt biex nieħu posti fil-misraħ

⁸iż-żgħażagħ kif jarawni kienu jinħbew, u x-xjuħ iqumu bilwieqfa.

⁹Il-kapijiet kien jaqtgħu kliemhom, u jqiegħdu subgħajhom fuq fommhom.

¹⁰Leħen il-kbarat kien jieqaf, u lsienhom jeħel mas-saqaf ta’ ħalqhom.

¹¹Min kien jismagħni kien iberikni, min kien jarani kien ifaħħarni.

¹²Għax kont neħles il-fqir li jittallab l-għajnuna, u l-iltim li ma kellux min jaqbeż għalih.

¹³Fuqi kienet tinżel il-barka tal-magħkus, u l-qalb tal-armla kont inferraħ.

¹⁴Ilbist il-ġustizzja u hi libbset lili, bħal mantar u turbant sarli s-sewwa tiegħi.

¹⁵Kont għajn għall-agħma, u riġel għall-magħtub.

¹⁶Kont missier għall-foqra, u l-kawża ta’ wieħed ma nafux kont nistħarreġ.

¹⁷Kont inkisser ix-xedaq tal-kiefer, u nġagħlu jerħi l-priża minn ħalqu.

¹⁸Jien għedt: ‘Fil-bejta tiegħi mmut wara jiem kotrana daqs ir-ramel.

¹⁹Għeruqi nfirxu sa ħdejn l-ilma, u billejl kelli n-nida fuq il-friegħi.

²⁰Sebħi baqa’ jiġġedded miegħi, dejjem ġdid il-qaws f’idejja.’

²¹In-nies kienet tismagħni siekta, tistenna l-parir mingħandi.

²²Wara li nitkellem jien ma kinux jerġgħu huma, kliemi kien jinżel fuqhom qatra fuq qatra.

²³Bħax-xita bikrija kienu jistennew kliemi, u jixorbuh bħax-xita tar-rebbiegħa.

²⁴Jekk kont nitbissmilhom, ma kinux jemmnu lil għajnejhom, u l-ferħ ta’ wiċċi xejn ma kienu jitilfu minnu.

²⁵Kont nurihom it-triq qisni rajjes, kont bħal sultan qalb is-suldati, fejn immexxihom jien kienu jimxu huma.