Read Maltese Bible with DC – IL-BIBBJA IL-KOTBA MQADDSA ĠOB 30 Bible Online

ĠOB 30 - Maltese Bible with DC – IL-BIBBJA IL-KOTBA MQADDSA bible

ĠOB 30

¹“Imma issa jwaqqgħuni għaż-żufjett dawk li huma iżgħar minni, u li missirijiethom mank kont irridhom joqogħduli mal-klieb tal-merħla tiegħi.

²Għax x’kienet tiswieli l-qawwa ta’ jdejhom, dawk li telqithom saħħithom kollha?

³Mifnija bil-għaks u bil-ġuħ, kienu jiġġerrew fix-xagħri, f’art il-waħx u l-ħrieb;

⁴ilaqqtu minn qalb l-għollieq il-ħaxix mielaħ, u jieħdu b’ikilhom għeruq il-ġummar.

⁵Imkeċċijin minn fost in-nies, jgħajtu warajhom qishom għal ħalliel,

⁶marru joqogħdu f’xi ħandaq, fil-gandotti jew fi xquq il-blat;

⁷jokorbu qalb l-imsaġar, u jitgeddsu taħt l-għollieq.

⁸Razza tal-boloh u nies bla isem, imwarrbin bil-frosta mill-pajjiż.

⁹U issa jien sirt iż-żufjett tagħhom, il-bniedem li ġejt f’ilsienhom.

¹⁰Jistmerruni u jwarrbu minni, xejn ma jżommhom milli jobżquli f’wiċċi.

¹¹Jitkixxfu għal biebi b’għajnejhom fuqi, kull rażan irmew quddiemi.

¹²Qam l-irmixk fuq il-lemin tiegħi, xeħtuli xkiel ma’ saqajja, ħejjew it-triq għat-telfien tiegħi.

¹³Ħassruli l-mogħdijiet tiegħi, ħsiebhom biss kif jeqirduni, m’hemmx min jeħlisni minnhom.

¹⁴Bħal minn selħa wiesgħa jidħlu għalija, jgħaddu jitgerbu qalb it-tiġrif.

¹⁵Twerwir fuq ieħor waqa’ fuqi, inkines bħar-riħ il-kobor tiegħi, u l-hena tiegħi għadda bħal sħaba.

¹⁶Issa qed iddub ġo fija ruħi, u ħakmuni jiem ta’ dwejjaq.

¹⁷Billejl għadmi jaħraq aktar minn kaldarun, u n-nervi ta’ ġismi ma jistriħux.

¹⁸B’saħħa kbira qabadni minn ħwejġi, rassni mill-għonq tal-qmis;

¹⁹Alla tefagħni fil-ħama, u sirt bħat-trab u r-rmied.

²⁰Jien ngħajjatlek u ma tweġibnix nibqa’ nsejjaħ u ma tagħtix kasi!

²¹M’għadekx li kont, sirt krudil miegħi, bil-qawwa kollha ta’ driegħek tagħmel għalija,

²²taqtagħni mill-art, trikkibni fuq ir-riħ, u titlaqni nitkaxkar mat-tempesta.

²³Jien naf li lejn l-Imwiet qed treġġagħni, lejn dar il-laqgħa għall-ħajjin kollha.

²⁴Se jerfa’ xi ħadd[38] idu fuq l-imgħarraq meta fl-hemm tiegħu jitolbu l-għajnuna?

²⁵U ma bkejtx jien għal min kienet iebsa għalih il-ħajja? Ma għalejtx jien għall-bniedem fil-bżonn?

²⁶Stennejt ir-risq u ġieni d-deni; ittamajt id-dawl u ġieni d-dlam.

²⁷Imsarni jbaqbqu bla mistrieħ, ġew għal wiċċi jiem ta’ niket.

²⁸B’qalbi sewda niġġerra bla faraġ, inqum fil-ġemgħa u ngħajjat:

²⁹Sirt jiena ħu x-xakalli, għandi bi sħabi n-ngħam.

³⁰Swiditli l-ġilda aktar minn kaldarun, għadmi jaħraq aktar minn riħ jikwi.

³¹Qalbet iċ-ċetra tiegħi għal daqq in-niket, u għall-għanja tal-bekkejja l-flawt tiegħi.