Read Maltese Bible with DC – IL-BIBBJA IL-KOTBA MQADDSA ĠOB 31 Bible Online

ĠOB 31 - Maltese Bible with DC – IL-BIBBJA IL-KOTBA MQADDSA bible

ĠOB 31

¹“Għamilt patt ma’ għajnejja li fuq xebba ma nixħethomx.

²U x’inhu s-sehem li qassam Alla mill-għoli? X’wirt ħejja Xaddaj mis-smewwiet?

³Mhux il-ħsara għall-midneb u l-iżventura għall-ħżiena?

⁴Iżda ma jarax Alla l-imġiba tiegħi? Ma jgħoddlix il-passi kollha tiegħi?

⁵Qatt imxejt jien bil-gideb? Qatt ħaffift il-pass lejn il-qerq?

⁶Ħa jiżinni Alla b’miżien tajjeb, u jagħraf il-ħajja bla tebgħa tiegħi.

⁷Jekk ilwejt mit-triq id-dritta, u qalbi strieħet wara t-tħajjir t’għajnejja, jew weħlet xi tebgħa ma’ jdejja,

⁸ħa niżra’ jien u l-frott jieħdu ħaddieħor, u dak li jinbitli jinqala’ mill-għeruq.

⁹Jekk issaħħret qalbi wara mara oħra, u ssajjajt għaliha wara bieb għajri,

¹⁰ħa titħan marti għal ħaddieħor, u jmilu fuqha rġiel oħrajn.

¹¹Għax dan hu għamil faħxi, dnub li jiġġudikawh l-imħallfin.

¹²Hu nar li jaħraq sat-Telfien, u jeqridli ġidi kollu.

¹³Qatt ċħadt il-jedd lill-qaddej tiegħi, jew lill-qaddejja xħin tlewmu miegħi?

¹⁴Le, għax x’kont nagħmel li kellu jqum Alla? X’kont inwieġeb li kien jiġi jistħarriġni?

¹⁵Min għamel lili fil-ġuf, ma għamilx ukoll lilu? Mhux l-istess wieħed sawwarna fi ħdan ommijietna?

¹⁶Qatt ċħadt jien lill-foqra dak li xtaqu? Ħallejt jien għajnejn armla jinfnew?

¹⁷Qatt kiltu waħdi l-bukkun tiegħi? Ma kielx ukoll minnu l-iltim,

¹⁸li minn ċkunitu rabbejt bħal missier, u mexxejtu sa minn ġuf ommu?

¹⁹Jekk rajt xi msejken mifni bl-għera, jew xi fqir li ma kellux għata,

²⁰u ma berkunix ġenbejh, jew ma ssaħħanx bis-suf tan-nagħaġ tiegħi;

²¹jekk erfajt idi kontra l-innoċenti, għax kelli fil-qorti min jaqbeż għalija[39],

²²ħa tinqala’ spallti minn ġo għonqi, u driegħi jinkiser mill-minkeb.

²³Għax kont nibża’ mill-kastig ta’ Alla, u ma niflaħx għall-kobor ta’ sebħu.

²⁴Qatt għedt lid-deheb: ‘Inti t-tama tiegħi,’ jew lid-deheb fin: ‘Bik mistrieħa rasi’?

²⁵Fraħt xi darba bil-kotra ta’ ġidi, jew bil-qligħ kbir li kisbuli jdejja?

²⁶Jekk rajt ix-xemx tiddi[40], u l-qamar tiela’ bi ġmielu,

²⁷tgħawwiet forsi qalbi bis-serqa, u tajthom bewsa b’idi ma’ fommi?

²⁸Mhuwiex delitt li jiġġudikawh l-imħallfin, talli nkun ċħadt ’l Alla li jsaltan fl-għoli?

²⁹Ħadt xi gost bid-deni tal-għadu tiegħi, inkella fraħt meta laqtitu l-ħsara?

³⁰Le, anqas ilsieni ma ħallejt jidneb b’xi talba ta’ saħta fuq ħajtu.

³¹Qatt qalu n-nies ta’ dari: ‘Mhux li konna nixbgħu mill-mejda tiegħu?’

³²L-ebda frustier ma ħallejt jgħaddi l-lejl barra, dari ftaħtha lill-vjaġġatur.

³³Qatt ħbejt bħal Adam dnubi, jew sarrejt fi ħdani ħtijieti,

³⁴jew bqajt sieket magħluq ġewwa dari, għalkemm l-għagħa tal-kotra kienet tbeżżagħni, u jkexkixni t-tmaqdir tat-tribù?

³⁵Mhux li kien jisma’ xi ħadd il-kawża tiegħi! Hawn hi l-firma tiegħi! Ħa jweġibni Xaddaj!

³⁶M’hux li kelli l-att tal-akkuża ta’ min xlieni! Fuq spallti kont inġorru, jew ma’ rasi ndawru bħal kuruna.

³⁷Kont ngħoddlu wieħed wieħed il-passi tiegħi, kont nersaq lejh bħal wieħed kbir.

³⁸Jekk għajjat kontrija r-raba’ tiegħi, u bkew flimkien ir-raddi tiegħu,

³⁹għax kilt bla ħlas mill-frott tiegħu, u dawk li ħadmuh fnejtilhom ruħhom,

⁴⁰flok qamħ jinbitli x-xewk, flok xgħir ħaxix ħażin.” Tmiem id-diskors ta’ Ġob.