Read Maltese Bible with DC – IL-BIBBJA IL-KOTBA MQADDSA ĠOB 32 Bible Online

ĠOB 32 - Maltese Bible with DC – IL-BIBBJA IL-KOTBA MQADDSA bible

ĠOB 32

¹Imbagħad dawk it-tlitt irġiel ma weġbuhx iżjed għax hu baqa’ jżomm ruħu b’ġust.

²Hawn xegħlet il-korla ta’ Eliħu[41] bin Barakel, il-Bużi, mill-familja ta’ Ram. Inkorla għal Ġob għax baqa’ jżomm li għandu raġun fil-kawża tiegħu ma’ Alla;

³inkorla wkoll għal tlitt iħbieb tiegħu għax ma sabux xi jweġbuh u hekk jiġi li taw tort lil Alla.

⁴Eliħu kien baqa’ sieket waqt li kienu jitkellmu huma ma’ Ġob għax kienu akbar minnu fiż-żmien.

⁵Iżda kif ra li dawn it-tlitt irġiel ma kienx baqgħalhom tweġiba fuq fommhom, Eliħu ried jiżfoga l-korla tiegħu.

⁶Mela qabad iwieġeb Eliħu bin Barakel, il-Bużi, u qal: “Jien żgħir fiż-żmien u intom mgħobbija bis-snin; għalhekk qgħadt lura, u bżajt quddiemkom inperreċ għerfi.

⁷Kont inżomm li l-jiem jitkellmu, u l-ħafna snin jgħallmu l-għerf.

⁸Iżda hu l-ispirtu fil-bniedem, nifs Xaddaj li jagħti d-dehen,

⁹u mhux għax xjuħ il-bnedmin jifhmu, lanqas għax anzjani ma jafu x’inhu s-sewwa.

¹⁰Għalhekk ngħid: ‘Isimgħu lili, jien ukoll irrid nuri fehemti.’

¹¹Ara qgħadt b’sabri nismagħkom titkellmu, u niżen ir-raġunijiet li ġġibu; intom u tagħżlu l-argumenti tagħkom

¹²ħsiebi kien wieqaf fuqkom. Iżda ma sibtx wieħed li jmeri ’l Ġob sewwa, ħadd minnkom ma għaraf iwaqqagħlu kliemu.

¹³Tiġux tgħidu: ‘Sibna l-Għerf[42] ma’ wiċċna; li Alla biss jista’ jegħlbu u mhux il-bniedem.’

¹⁴Għalhekk mhux b’dal-mod infassalhom l-argumenti, mhux bi kliemkom se nwieġbu ’l Ġob.

¹⁵Arahom! tbikkmu, ma ssuktawx iwieġbu, il-kliem naqashom.

¹⁶Se nibqa’ nistenna meta huma siktu, meta waqfu u ma weġbux aktar?

¹⁷Le! Inwieġeb jien ukoll kif imissni, jien ukoll irrid nuri fehemti!

¹⁸Imfawwar jien bil-kliem li għandi, u jrossni l-ispirtu ta’ ġo fija.

¹⁹Ħdani qisu mimli b’inbid jiffermenta, irid jinfaqa’ bħal ġarar b’inbid ġdid.

²⁰Ikolli nitkellem ħa nsib mistrieħ, niftaħ fommi u nwieġeb,

²¹bla ma nżomm ma’ xi ħadd, bla ma mmelles ’l ebda bniedem.

²²U tabilħaqq anqas naf immelles, u għax kieku dlonk jaħtafni l-Ħallieq tiegħi.