Read Maltese Bible with DC – IL-BIBBJA IL-KOTBA MQADDSA ĠOB 33 Bible Online

ĠOB 33 - Maltese Bible with DC – IL-BIBBJA IL-KOTBA MQADDSA bible

ĠOB 33

¹“Issa, Ġob, qis li tisma’ kliemi, u tagħti widen għal kulma ngħidlek.

²Ara, se niftaħ fommi, kliemi qiegħed fil-ponta ta’ lsieni.

³Se ngħid għad-dritt dak li għandi f’moħħi, u xufftejja jitkellmu s-sewwa,

⁴għax l-ispirtu ta’ Alla għamilni, u n-nifs ta’ Xaddaj jagħtini l-ħajja.

⁵Isa, weġibni jekk għandek ħila, ħejji ruħek ħa teħodha miegħi.

⁶Ara, jien bħalek quddiem Alla, jiena wkoll imsawwar mit-tajn;

⁷xejn ma għandek għax tibża’ minni, mhux se tkun tqila idi fuqek.

⁸Żgur li għedt int quddiemi għedtu, u leħen kliemek smajtu.

⁹Int għedt: ‘Jien safi, f’xejn ma nqast; safi jien, nadif jien.

¹⁰Iżda Hu jfittex fiex jaqbad miegħi, u jżommni b’għadu tiegħu.

¹¹Iqegħedli fiċ-ċipp riġlejja, u jgħassisli triqati kollha.’

¹²Ara, għal dan inwieġbek: ‘Sejjer żball’, għax Alla hu akbar mill-bniedem.

¹³Għaliex trid teħodha miegħu jekk ma jweġibx għal kull kelma tiegħek?

¹⁴Alla jitkellem darba, u kelmtu ma jtennihiex.

¹⁵Fil-ħolm, f’xi dehra billejl, xħin jaqa’ n-ngħas fuq il-bnedmin, u jkunu reqdin fuq friexhom,

¹⁶dak il-ħin Alla jnebbaħhom, u bit-twiddib ibeżżagħhom,

¹⁷biex idawwar il-bniedem minn triq il-ħażin u jħarsu mill-kburija;

¹⁸biex iħarislu ruħu mill-qabar, u ’l ħajtu milli taqsam il-ħondoq[43].

¹⁹Iwiddbu wkoll bl-uġigħ fuq is-sodda tiegħu, u bit-torturi bla heda f’għadmu;

²⁰meta titmeżmeż gerżumtu mill-ħobż, u ma jitħajjarx aptitu mill-ikel bnin;

²¹meta jdub laħmu u ma jidhirx iżjed, u l-għadam li ma kienx jidher jaqbeż ’il barra;

²²meta toqrob ruħu lejn il-qabar, u ħajtu lejn dar il-mejtin,

²³imma jekk ikollu ħdejh anġlu, wieħed minn elf, medjatur[44], li juri bniedem kif għandu jġib ruħu, u jreġġgħu lejn is-sewwa tiegħu,

²⁴u jħenn għalih u jgħid ’l Alla: ‘Aħfirhielu, tibagħtux il-qabar, sibt rahan għall-fidwa ta’ ħajtu,’

²⁵jixxettel ġismu bħal meta kien tfajjel u jerġa’ għaż-żmien ta’ żgħożitu.

²⁶Jitlob ’l Alla u jkun milqugħ tajjeb, u jara bil-ferħa wiċċ Alla li jreġġgħu għal li kien.

²⁷U jmur itenni lin-nies u jgħid: ‘Kont dnibt u għawwiġt is-sewwa, imma Alla ma ħallasnix kif imiss;

²⁸ħelisli ’l ruħi milli tmur fil-qabar, u qed tgawdi ħajti d-dawl.’

²⁹Ara: dan kollu jagħmel Alla, darbtejn tlieta, b’risq il-bniedem,

³⁰biex ireġġagħlu ħajtu mill-fossa lejn id-dawl f’art il-ħajjin.

³¹Ħsiebek hawn, Ġob, ismagħni! Stabar sa ma nitkellem.

³²Jekk għandek xi tgħid, weġibni, tkellem, għax nixtieq li jidher is-sewwa tiegħek.

³³Jekk m’għandekx, agħtini widen, iskot u ngħallmek l-għerf.”