Read Maltese Bible with DC – IL-BIBBJA IL-KOTBA MQADDSA ĠOB 34 Bible Online

ĠOB 34 - Maltese Bible with DC – IL-BIBBJA IL-KOTBA MQADDSA bible

ĠOB 34

¹Eliħu ssokta jgħid:

²“Isimgħu, għorrief, kliemi, intom li tifhmu, iftħu widnejkom;

³għax il-widna tiżen il-kliem bħalma l-ħalq itiegħem l-ikel.

⁴Ħa nistħarrġu għalina x’inhu s-sewwa, u naqtgħuha bejnietna x’inhu t-tajjeb.

⁵Ġob qal: ‘Ġust jien, iżda Alla ċaħħadni mid-dritt tiegħi.

⁶Kontra l-ġustizzja jien ħadt it-tort, midrub jien bil-vleġeġ tiegħu għalkemm bla ħtija.’

⁷Hawnx bniedem bħal Ġob jixrob bħall-ilma ż-żebliħ?

⁸Hu ssieħeb man-nies il-ħżiena, u jaqbel ma’ dawk ta’ fehmiet mgħawġa.

⁹Hu stqarr: ‘Xejn ma jiswielu l-bniedem li jfittex jimxi sewwa ma’ Alla.’

¹⁰Imma intom, nies bil-għaqal, isimgħuni: Ma jistax ikun li Alla jagħmel id-deni, li Xaddaj jagħmel dak li hu ħażin.

¹¹Għax Hu jħallas il-bniedem skont għemilu, lil kull wieħed skont ma jġib ruħu.

¹²Le, Alla qatt ma jaħdem id-dnewwa, Xaddaj qatt ma jmur kontra l-ġustizzja.

¹³Min tahielu l-ħakma fuq l-art tiegħu? Min irħieha fi ħsiebu t-tmexxija tad-dinja?

¹⁴Jekk iraġġa’ għal għandu l-ispirtu tiegħu, u jieħu lura nifs il-ħajja,

¹⁵jinqered kull ħaj f’salt wieħed, u jerġa’ l-bniedem lejn it-trab.

¹⁶Issa, jekk għandek għaqal isma’ x’se ngħidlek, iftaħ widnejk għas-sens ta’ kliemi.

¹⁷Jista’ jiggverna min jobgħod is-sewwa? Trid int tikkundanna l-Ġust innifsu?

¹⁸Lil Dak li jgħid lis-sultan: ‘Ja vili’, u ‘Ja nies ħżiena’ lill-prinċpijiet?

¹⁹Hu ma jimxix bil-favuri mal-kbarat, lanqas jistma l-għani aktar mill-fqir, għax kollha huma xogħol idejh.

²⁰F’sabta jmutu mqar f’nofs ta’ lejl, għad-daqqa t’idu jispiċċaw l-għonja, u jgħibu t-tiranni bla taħbit.

²¹Għax Alla għajnejh fuq l-imġiba tal-bniedem, u jiflilu passih kollha.

²²M’hemmx dlam lanqas swied, fejn jista’ jinħeba min jagħmel id-dnewwa.

²³Lil ħadd ma jagħti żmien fiss, biex jersaq quddiemu għall-ħaqq.

²⁴Iġarraf, bla ma jistaqsi, lill-qawwijin, u jqiegħed oħrajn minflokhom.

²⁵U billi jaf tajjeb għemilhom, jaqlibhom billejl u jiġġarrfu.

²⁶Ta’ ħżiena li huma jaħbathom, f’post fejn jistgħu jarawhom,

²⁷talli tbiegħdu minnu, u warrbu kull twissija tiegħu,

²⁸hekk li ġagħlu l-għajjat tal-fqir jitla’ quddiemu, u Hu sama’ l-krib tal-maħqurin.

²⁹U jekk jibqa’ ħiemed, min jista’ jagħtih tort? U min sa jilmħu jekk jaħbi wiċċu? Iżda fuq ġnus u bnedmin Hu jishar,

³⁰biex la jsaltan wieħed ħażin, lanqas ma jinstaram il-poplu.

³¹Issa nagħmluha li wieħed jgħid lil Alla: ‘Tqarraqt, iżda ma nżidx nidneb,

³²sa ma nagħraf dan għallimni int, jekk għamilt id-deni ma nissuktax,’

³³taħseb li għandu jħallsu kif jidher lilek, għax inkella ma toqgħodx għalih? Għandu jgħid lilek: ‘Int tagħżel, mhux jien’? Għidli, mela, x’jidhirlek!

³⁴Jgħiduli n-nies bil-għaqal, u bħalhom jgħid l-għaref li jismagħni:

³⁵‘Ġob ma tkellimx ta’ għaref, dak li qal kien bla għaqal.

³⁶Iżda Ġob sal-aħħar għandu jiġġarrab għat-tweġib tiegħu ta’ midgħi.

³⁷Hu jżid dan ma’ dnubietu, li jiċħad f’wiċċna stess it-tort tiegħu, u ma jehdiex imaqdar lil Alla.’ ”