Read Maltese Bible with DC – IL-BIBBJA IL-KOTBA MQADDSA ĠOB 35 Bible Online

ĠOB 35 - Maltese Bible with DC – IL-BIBBJA IL-KOTBA MQADDSA bible

ĠOB 35

¹Eliħu ssokta jgħid:

²“Taħseb int li dan huwa sewwa, tgħid: ‘Jien għandi raġun, mhux Alla’,

³jew xħin tgħid: ‘X’jiswieli? Fiex jien aħjar jekk ma nidnibx?’

⁴Għal dan jien hekk inwieġeb, lilek u ’l ħbiebek f’daqqa:

⁵‘Erfa’ għajnejk lejn is-sema, ħares, qis is-sħab kemm hu ogħla minnek!

⁶Jekk tidneb x’deni tagħmel lil Alla? U mqar tkattar ħtijietek, x’tagħmillu?

⁷Jekk tagħmel is-sewwa x’tagħtih? X’se jieħu b’daqshekk mingħandek?

⁸Lil bniedem bħalek tolqot ħżunitek, lill-bnedmin ħutek jiswa s-sewwa tiegħek.

⁹Taħt it-toqol tal-moħqrija n-nies tgħajjat, u kontra driegħ il-qawwijin titlob l-għajnuna.

¹⁰Iżda ħadd minnhom ma jgħid: ‘Fejn hu Alla li ħalaqni, li jagħti l-wens billejl,

¹¹li jgħallimna aktar mill-bhejjem tal-art, u jagħmilna egħref mit-tajr tal-ajru.’

¹²Uħud jgħajtu iżda Hu ma jweġibx, minħabba kburithom ta’ nies ħżiena.

¹³Kollu ta’ xejn[45], Alla ma jagħtix widen għall-kliem fieragħ, Xaddaj ma jagħtix kasu.

¹⁴Kemm inqas, mela, xħin int tgħid li ma tilmħux, li ressaqt kawża quddiemu u qed tistennieh,

¹⁵jew xħin tgħid li xejn ma tikkastiga l-korla tiegħu, u li Hu ma jagħrafx sewwa l-ħtija?

¹⁶Tassew, fil-vojt Ġob jiftaħ ħalqu, ipaċpaċ ħafna u bla sens.”