Read Maltese Bible with DC – IL-BIBBJA IL-KOTBA MQADDSA ĠOB 36 Bible Online

ĠOB 36 - Maltese Bible with DC – IL-BIBBJA IL-KOTBA MQADDSA bible

ĠOB 36

¹Eliħu ssokta jgħid:

²“Stenna, Ġob, ftit ieħor ħalli nurik raġunijiet oħra favur Alla.

³Naqla’ mill-qiegħ tal-ħażna t’għerfi ħa nagħti raġun lill-Ħallieq tiegħi.

⁴Emminni ngħidlek: ‘M’hemmx tagħwiġ fi kliemi; għaref kif imiss għandek quddiemek.’

⁵Ara, Alla hu ta’ qawwa liema bħalha, iżda ma jistmellx lis-sinċiera.

⁶Ma jħallix lill-ħżiena jgħixu, u jagħmel ħaqq mal-maħqurin.

⁷Ma jwarrabx għajnejh minn fuq il-ġusti; fuq tron iqegħedhom mas-slaten; għal dejjem ikunu merfugħa.

⁸Iżda jekk jiġu marbuta bil-ktajjen, u miżmuma fil-ħbula tan-niket,

⁹Hu jurihom dak li għamlu, li dinbu għax refgħu rashom.

¹⁰Jiftħilhom widnejhom għat-twissija, u jordnalhom iduru mill-ħażen.

¹¹Jekk jisimgħu u joqogħdu jgħaddu jiemhom fil-ġid, u sninhom fit-tgawdija.

¹²Jekk ma jobdux jgħaddu għal Art l-Imwiet, imutu bla ma jintebħu.

¹³Dawk ta’ ras iebsa jsorru l-korla, u ma jitolbuhx għajnuna xħin jgħakkishom,

¹⁴imutu fil-fjur ta’ żgħożithom, itemmu ħajjithom bħaż-żienja.

¹⁵Hu jifdi l-magħkus bit-tagħkis tiegħu, jiftaħlu għajnejh bin-niket tiegħu.

¹⁶Lilek ukoll mill-għawġ[46] jaqilgħek f’post komdu jqiegħdek u bla xkiel, u jkollok mejda mimlija bl-aħjar ikel.

¹⁷Iżda int tiddefendix il-kawża tal-ħżiena u żomm imħarsa d-digrieti tiegħu.

¹⁸La tħallix l-għana jħassrek, tixxaħħamx b’xi rigal kbir.

¹⁹Se jiswa quddiemu fil-hemm ġidek, u s-setgħa kollha li ksibt minnu?

²⁰Tixxennaqx għal dak il-lejl, meta jgħibu l-popli mnejn ikunu.

²¹Qis li ma ddurx lejn il-ħażen, għax għalhekk ġejt imġarrab mill-hemm.

²²Ara, Alla jgħaddi ’l kulħadd fil-qawwa tiegħu; u liema mgħallem iħabbatha miegħu?

²³Min urieh kif għandu jimxi? Min jista’ jgħidlu ‘għamilt ħażin’?

²⁴Qis li tfaħħar il-kobor t’għemilu, il-ħolqien li għannewh il-bnedmin.

²⁵Iħares lejh kull bniedem, jarawh mill-bogħod il-bnedmin.

²⁶Alla hu hekk kbir li anqas nifhmuh, u l-għadd ta’ sninu ma nsibux tarfu.

²⁷Hu jiġbed il-qtari tal-ilma, li jqattru x-xita mill-ġibjun tiegħu,

²⁸sa ma jimtela s-sħab bihom u jsawbuhom fuq l-art f’ħalbiet.

³¹Bihom Hu jitma’[47] l-popli, jagħtihom ikel bil-kotra. Min jista’ jifhem kif jinfirex is-sħab u jkarwat ir-ragħad fit-tinda tiegħu? Hu jifrex madwaru d-dawl tiegħu, iwaqqaf fuq għejun il-baħar it-tron tiegħu.

³²Fuq kefef idejh tleħħ il-berqa, u jwaddabha fejn irid jolqot.

³³L-Għoli jitkellem bir-ragħad tiegħu, jiżfoga fuq il-ħażen il-qilla tiegħu!