Read Maltese Bible with DC – IL-BIBBJA IL-KOTBA MQADDSA ĠOB 37 Bible Online

ĠOB 37 - Maltese Bible with DC – IL-BIBBJA IL-KOTBA MQADDSA bible

ĠOB 37

¹Minħabba f’hekk tħabbat qalbi, trid taqbeż barra minn postha.

²Isimgħu sewwa ’l leħnu jriegħed, it-tkarwit ħiereġ minn fommu.

³Ileħħ taħt is-sema kollu l-beraq tiegħu, u jilħaq l-art minn tarf għal ieħor.

⁴Wara dan iddamdam ir-ragħda, il-leħen tal-kobor tiegħu, u ħadd ma jiflaħ għall-ħsejjes tagħha.

⁵Iriegħed Alla b’leħnu tal-għaġeb, jagħmel ħwejjeġ kbar ma nifhmuhomx.

⁶Hu jgħid lis-silġ: ‘Inżel fuq l-art’, u lill-ilma tax-xita: ‘Agħmel bil-qliel’.

⁷Hu jaqfel ġewwa l-bnedmin kollha biex jagħraf kulħadd li Hu għamel dan.

⁸U jidħlu l-bhejjem fl-għerien tagħhom, joqogħdu għall-kenn fil-bejta tagħhom.

⁹Mill-kamra tan-Nofsinhar joħroġ ir-riefnu[48], u l-ksieħ mir-riħ tat-Tramuntana.

¹⁰Bin-nifs ta’ Alla jingħata s-silġ, u l-firxiet tal-ilma bl-infiħ ta’ mnifsejh.

¹¹Ix-xemx tiegħu tiknes iċ-ċpar, id-dawwala tiegħu tferrex is-sħab.

¹²U jdur is-sħab ’l hawn u ’l hemm, ibiddel ir-rotta skont it-tmexxija tiegħu, u jagħmel kulma jordnalu fuq wiċċ id-dinja kollha tiegħu.

¹³Sew b’kastig, jekk ma jobdix, sew bi ħniena, li jrid hu jsir.

¹⁴Isa, Ġob, agħti widen għal dan, aħseb fuq l-għeġubijiet ta’ Alla!

¹⁵Taf xejn kif Alla jrieġi l-ħlejjaq, kif iġiegħel tberraq is-sħaba tiegħu?

¹⁶Taf int kif iżomm fl-ajru s-sħab, għaġeb ta’ Dak li għerfu perfett?

¹⁷Int, li ħwejġek jisħnu fuqek xħin taqa’ l-kalma bir-riħ isfel,

¹⁸frixtha int miegħu l-ħnejja tas-sema, iebsa daqs mera tal-bronż imdewweb?

¹⁹Għarrafna int x’għandna ngħidulu, għax aħna fid-dlam u ma nsibux kliem.

²⁰Jista’ bniedem jgħid ’l Alla xħin għandu jitkellem jew iġagħlu jagħmel xi stqarrija?

²¹Jiġi ħin li d-dawl ma narawhx, ikun imdallam mis-sħab oħxon. Iżda mbagħad jonfoħ riħ li jiknishom,

²²u tfiġġ dija tad-deheb mit-Tramuntana[49], Alla mdawwar b’sebħu tal-biża’.

²³Xaddaj li jista’ kollox aħna ma nilħquhx; Hu għoli fil-qawwa u l-ħaqq, Hu sid il-ġustizzja, m’għandux iwieġeb.

²⁴Għalhekk għandu kulħadd jibża’ minnu, u jagħtih qima kull min hu għaref.”