Read Maltese Bible with DC – IL-BIBBJA IL-KOTBA MQADDSA ĠOB 38 Bible Online

ĠOB 38 - Maltese Bible with DC – IL-BIBBJA IL-KOTBA MQADDSA bible

ĠOB 38

¹Il-Mulej wieġeb lil Ġob minn ġot-tempesta[50] u qallu:

²“Min hu dan li jrid joskura l-pjan ta’ Alla bi kliem bla għaqal?

³Isa, ħażżem bħal qalbieni ġenbejk[51], ħa nsaqsik u inti weġibni.

⁴Fejn kont int jien u nqiegħed sisien l-art? Għidli, jekk għandek id-dehen.

⁵Min ħażżiżhom il-qisien tagħha? Min ħadulha l-qjies? Żgur taf int!

⁶Fuqiex qed iżommu l-kolonni tagħha? Min qiegħed ras il-għareb tagħha,

⁷hi u tgħanni l-ġemgħa tal-kwiekeb ta’ filgħodu, u tgħajjat bil-ferħ ix-xirka ta’ wlied Alla[52]?

⁸Min kien dak li għalaq il-baħar b’bibien, meta dan b’qawwa ħareġ mill-ġuf,

⁹meta bis-sħab libbistu, u bid-dlam fisqejtu,

¹⁰meta t-truf tiegħu qegħedtlu bħal xatbiet, u bibien li bihom għalaqtu

¹¹u għedtlu: ‘Sa hawn biss tasal u mhux aktar, ma taqbiżx minn hawn il-qawwa ta’ mwieġek’?

¹²Qatt kemm ilek fid-dinja kkmandajt is-sebħ, jew urejt liż-żerniq postu,

¹³biex jaqbad l-art mit-truf tagħha, u jfarfar minnha l-ħżiena?

¹⁴Bih tinbidel bħal tafal taħt is-siġill, u tiġi mżewqa bħal libsa.

¹⁵Jinqata’ lill-ħżiena d-dawl tagħhom, u d-driegħ merfugħ jitkisser.

¹⁶Qatt wasalt sa għejun il-baħar, u mxejt fuq il-qiegħ tiegħu?

¹⁷Qatt urewk bibien l-Imwiet? Qatt rajt b’għajnejk bibien id-Dlam?

¹⁸Qatt ħaddant b’ħarstek il-medda sħiħa tal-art? Taf tgħidli l-wisa’ kollu tagħha?

¹⁹Minn fejn tgħaddi għal ħdejn id-dawl, u fejn joqogħdu d-dlamijiet,

²⁰biex tmexxihom sas-saltna tagħhom, jew tqabbadhom it-triq lejn darhom?

²¹Int tafu dan[53] la diġà kont imwieled, u l-għadd ta’ sninek kbir tassew!

²²Qatt wasalt sal-imħażen tal-borra? Rajthom xejn il-ħażniet tas-silġ,

²³li għandi merfugħa għal żmien il-ħsara, għal jiem it-taqbid u l-gwerra[54]?

²⁴Kif tinfirex is-sħana, u jixtered fuq l-art ir-riħ isfel?

²⁵Min fetaħ għall-għargħar is-swieqi, u t-triq għall-beraq tar-ragħad,

²⁶biex jagħmel ix-xita fuq art bla nies, fuq deżert li ħadd ma jgħix fih,

²⁷biex isaqqi art żdingata u mitluqa, u jnibbet ħxejjex minn art maħruqa?

²⁸Jaqaw għandha xi missier ix-xita? U l-qtar tax-xita min nisslu?

²⁹Minn ħdan min ħareġ is-silġ? Min ta t-twelid lill-ġlata tas-sema,

³⁰li biha jibbies daqs il-ġebel l-ilma, u jagħqad wiċċ il-baħar bla qiegħ?

³¹Għandek il-ħila tgħaqqad il-kwiekeb tat-Trajja[55], jew tħoll minn xulxin l-istilel tal-Ġgant?

³²Toħroġ inti f’waqtha l-kewkba Mażarot, jew tmexxi l-Orsa biż-żgħar tagħha?

³³Taf hekk sewwa l-liġijiet tas-sema, li tikteb għall-art l-ordni tagħhom?

³⁴Tista’ tgħolli sas-sħab leħnek, u tniżżel fuqek ħalba xita?

³⁵Tibgħat int il-beraq u jmorrulek? Se jgħidulek: ‘Arana, sejrin’?

³⁶Min nissel f’Thot[56] l-għerf? Min żejjen bid-dehen lil Sekwi?

³⁷Min jista’ b’għerfu jgħodd is-sħab, jew jaqleb il-qliel tal-ilma tas-sema,

³⁸meta tkun għaqdet ġebla l-ħamrija u t-tub imwaħħal flimkien?

³⁹Taqbad int il-priża għall-iljuna, u ttaffi l-ġuħ tal-frieħ tagħha,

⁴⁰xħin ikunu mixħuta fl-għar tagħhom jew jissajjaw fil-moħbi għall-ħatfa?

⁴¹Min iħejji liċ-ċawlun l-ikla tiegħu xħin jgħajtu ’l Alla ż-żgħar tiegħu, u jkunu jwerżqu bil-ġuħ?