Read Maltese Bible with DC – IL-BIBBJA IL-KOTBA MQADDSA ĠOB 39 Bible Online

ĠOB 39 - Maltese Bible with DC – IL-BIBBJA IL-KOTBA MQADDSA bible

ĠOB 39

¹“Taf int meta jferrgħu l-mogħoż tal-muntanji? Qatt rajt iċ-ċriev waqt il-ħlas tagħhom?

²Tgħodd int ix-xhur tat-tqala tagħhom, u tkun taf xħin għandhom jeħilsu?

³Huma jinżlu kokka u jferrgħu l-boton, u jerħu fix-xagħri l-frieħ tagħhom.

⁴Meta jissaħħu l-frieħ u jikbru, jitilqu u ma jiġux lura lejhom.

⁵Min telaq ħieles lill-ħmar selvaġġ? Min qatagħlu l-irbit tiegħu?

⁶Kont jien li tajtu d-deżert b’daru, u l-art selvaġġa b’għamara tiegħu.

⁷Hu jistmerr il-ħsejjes tal-belt, u ma jridx jisma’ ordnijiet tas-sewwieq.

⁸Idur fuq l-għoljiet għall-mergħa tiegħu, ifittex kull roqgħa ta’ ħdura.

⁹Irid jewwilla l-gendus selvaġġ jaħdimlek, jew jgħaddi l-lejl ħdejn il-maxtura tiegħek?

¹⁰Torbotlu inti ħabel m’għonqu, u żżommu jxattab ir-raddi warajk?

¹¹Tafdah int għax b’saħħtu ħafna, u terħi lilu x-xogħol iebes tiegħek?

¹²Temmen int li jiġik lura biex jidres il-qamħ fuq il-qiegħa tiegħek?

¹³Ġewnaħ in-nagħma[57] jħabbat bil-qawwa, iżda n-nagħma bħall-għarnuq ma ttirx.

¹⁴Meta titlaq fuq l-art il-bajd tagħha, u tħallihom jisħnu fit-trab,

¹⁵ma jiġix f’moħħha li xi riġel jista’ jgħaffiġhom, jew tirfishom xi bhima selvaġġa.

¹⁶Twebbes qalbha għal frieħha, qishom mhumiex tagħha, ma tinkeddx jekk jisfa fix-xejn ix-xogħol tagħha.

¹⁷Dan għax Alla ċaħħadha mill-għerf, u ma taha l-ebda sehem fid-dehen.

¹⁸Iżda xħin tagħti s-salt u tirranka, tisfida liż-żiemel u r-rikkieb.

¹⁹Tagħti int[58] liż-żiemel is-saħħa, jew tlibbislu għonqu bix-xuxa?

²⁰Iġġagħlu inti jaqbeż bħall-ġrad, hu li jbeżżgħek xħin jiżher u jonfor?

²¹Kollu ferħan iħabbat bil-qawwa nagħlu, u joħroġ b’saħħa għal quddiem l-armi.

²²Jisfida l-periklu, ma jitwerwirx, lanqas jinqata’ quddiem is-sejf.

²³Fuq dahru ċċekċek il-barżakka, tleqq il-lanza u x-xabla magħha.

²⁴Bil-ħeġġa u l-leblieba t-triq jiblagħha, ma jibqax sabar fih kif jisma’ t-tromba.

²⁵Għal kull żarżira jiżher waħda, ixomm mill-bogħod it-taqbida, it-tħambiq tal-fizzjali u l-għajjat ta’ gwerra.

²⁶Jaqaw għallimtu int jittajjar is-seqer, u jifrex ġwenħajh lejn in-Nofsinhar?

²⁷U l-ajkla b’ordni tiegħek li titla’ fl-għoli, u tagħmel hemm fuq nett il-bejta tagħha?

²⁸Fuq l-irdum hi toqgħod u tgħaddi l-lejl, fuq il-qċaċet il-fortizza tagħha.

²⁹Minn hemm fuq tgħarrex għall-priża, jarawha mill-bogħod għajnejha.

³⁰Il-frieħ tagħha jsoffu d-demm, fejn ikunu l-maqtulin hemm tkun hi.”