Read Maltese Bible with DC – IL-BIBBJA IL-KOTBA MQADDSA ĠOB 4 Bible Online

ĠOB 4 - Maltese Bible with DC – IL-BIBBJA IL-KOTBA MQADDSA bible

ĠOB 4

¹Wieġeb Elifaż it-Temani u qal:

²Jekk ngħidulek kelma tiflaħ għaliha? Imma min jista’ jżomm fommu sieket?

³Ara, lix-xjuħ int kont tgħallimhom, u l-idejn merħija kont issaħħaħ.

⁴Min kien jogħtor kien iqajmu kliemek, u l-irkupptejn mitruħa jsaħħaħlu.

⁵Issa li ġie dan fuqek, tisbel, għax l-għawġ laqat lilek, tinstaram.

⁶Ma jagħmillekx iżjed il-qalb twemminek? Ma tnissillekx tama ħajtek bla tebgħa?

⁷Ftakar: liema bniedem bla ħtija ntilef? Fejn qatt rajt in-nies sewwa meqruda?

⁸Milli rajt jien, dawk li jaħdmu l-ħażen u l-għawġ jiżirgħu, ħażen u għawġ jaħsdu;

⁹b’nifs ta’ Alla jinqerdu, b’riefnu tal-korla tiegħu jintemmu.

¹⁰Jiskot għajjat l-iljun[10] u tgargir l-iljuna, u l-frieħ tal-ljun jitfarrkulhom snienhom.

¹¹Imut l-iljun għax tonqsu l-priża, u l-frieħ tal-ljuna jixterdu.

¹²Issa lili waslet kelma bil-ħatfa, u ħakmet widinti d-diwi tagħha;

¹³fit-tħassib dwar fantażmi billejl, meta jaqa’ n-ngħas tqil fuq il-bnedmin,

¹⁴qabadni biża’ u tkexkix, li regħedli għadmi kollu.

¹⁵Għadda riħ minn fuq wiċċi, riefnu qajjem xewk xewk lil ġismi.

¹⁶Xi ħadd kien wieqaf, ma stajtx nagħraf wiċċu, tfaċċat xbieha quddiem għajnejja, skiet … u mbagħad smajt leħen:

¹⁷“Jista’ l-bniedem ikun ġust quddiem Alla[11], il-maħluq ikun safi f’għajnejn Dak li ħalqu?

¹⁸Jekk lanqas il-qaddejja tiegħu Alla ma jafda, u sal-anġli tiegħu jsib xi jgħid fihom,

¹⁹kif jistgħu dawk li jgħammru fi djar tat-tafal, li s-sisien tagħhom imwaqqfa fit-trab, ikunu safja f’għajnejn min għamilhom?

²⁰Bejn tlugħ ix-xemx u nżulha jitfarrku, u jgħibu għal dejjem bla isem.

²¹Iva, jinqata’ l-ħabel tat-tinda tagħhom, u jmutu nieqsa mill-għerf.”