Read Maltese Bible with DC – IL-BIBBJA IL-KOTBA MQADDSA ĠOB 40 Bible Online

ĠOB 40 - Maltese Bible with DC – IL-BIBBJA IL-KOTBA MQADDSA bible

ĠOB 40

¹Il-Mulej kellem lil Ġob u qallu:

²“Bi ħsiebu jċediha min qabad kawża ma’ Xaddaj? Ħa jwieġeb, mela, dak li għandu xi jgħid f’Alla!”

³Ġob wieġeb lill-Mulej u qallu:

⁴“X’nista’ nwieġeb jien li ma niswiex karfa? Ikolli nqiegħed idi fuq ħalqi!

⁵Darba tkellimt u ma nerġax; darbtejn, u ma nissuktax.”

⁶U l-Mulej wieġeb lil Ġob minn ġot-tempesta:

⁷“Ħażżem ġenbejk bħal wieħed qawwi, ħa nsaqsik u int għallimni.

⁸Trid int twaqqa’ s-sentenza tiegħi, tagħti tort lili biex tieħu raġun int?

⁹Għandek inti driegħ bħal ta’ Alla? Tista’ theżżeż b’leħen bħal tiegħu?

¹⁰Iżżejjen, mela, bil-kobor u l-foħrija, ilbes is-sebħ u l-ġmiel;

¹¹sawwab il-fawra tal-qilla tiegħek, ħares lejn kull kburi u waqqgħu,

¹²ħares lejn kull kburi u baxxih, kexkex bid-dija tiegħek il-ħżiena,

¹³idfinhom fit-trab flimkien, għammdilhom wiċċhom fil-qabar,

¹⁴imbagħad jiena stess infaħħrek, talli rebbħitek il-leminija tiegħek.

¹⁵Ħares issa lejn l-ippopotamu li jien ħlaqt bħalma ħlaqt lilek; ħaxix jiekol dak bħall-baqar.

¹⁶Iżda x’saħħa għandu f’ġenbejh! Fil-muskoli ta’ żaqqu l-qawwa tiegħu.

¹⁷Denbu iebes daqs iċ-ċedru, l-għeruq ta’ kuxxtejh mibruma.

¹⁸Għadmu kanen tal-bronż, u l-kustilji vireg tal-ħadid.

¹⁹Hu l-aqwa fost l-opri ta’ Alla, min għamlu biss jista’ għalih;

²⁰l-għoljiet iġibulu l-għelejjel tagħhom, hemm jitliegħbu l-bhejjem selvaġġi.

²¹Hu jimtedd taħt is-siġar tas-seder[59], jinħeba qalb il-qasab u fl-għadajjar.

²²Ikollu d-dell mill-weraq tas-seder, u ż-żafżâf tal-wied idur miegħu.

²³Jekk tfur ix-xmara ma jinstaramx, lanqas jekk jogħla sax-xifer il-Ġordan.

²⁴Min sa jaqbdu minn għajnejh, u min jigganġah minn imnieħru?

²⁵Xi ngħidu mbagħad għall-kukkudrill? Se taqbdu inti b’sunnara, jew torbotlu b’ħabel ilsienu?

²⁶Se tgħaddilu lenza minn imnieħru, jew tinfidlu b’ġanċ ix-xedaq?

²⁷Se joqgħod jittallab ħniena mingħandek, jew ifissdek bi kliem mieles?

²⁸Taħseb int li jintrabat miegħek, biex joqgħodlok b’qaddej għal dejjem?

²⁹Se tilgħab bih bħal għasfur, u torbtu għall-bniet iż-żgħar tiegħek.

³⁰Se jiftiehmu fuq prezzu s-sajjieda, u jitqassam lill-bejjiegħa?

³¹Timlielu int bil-vleġeġ ġildu, jew rasu bil-foxxni?

³²Ipprova midd idek fuqu; tibqa’ tiftakar it-taqtigħa, u darb’oħra ma terġax.