Read Maltese Bible with DC – IL-BIBBJA IL-KOTBA MQADDSA ĠOB 41 Bible Online

ĠOB 41 - Maltese Bible with DC – IL-BIBBJA IL-KOTBA MQADDSA bible

ĠOB 41

¹Ara, ġiet fix-xejn it-tama ta’ min ipprova, sa l-allat marru għal tulhom għad-dehra tiegħu.

²Ma jiħraxx jewwilla xħin wieħed iqajmu? Min għandu l-ħila jieqaf quddiemu?

³Min tqabad miegħu u ħareġ bis-sliema? Anqas wieħed mis-sema ’l isfel.

⁴Għalhekk ma noqgħodx sieket dwar ġismu, irrid nitkellem fuq saħħtu liema bħalha.

⁵Min jista’ jċarrat il-libsa ta’ fuqu? Min ixoqqha l-kurazza doppja tiegħu?

⁶Min jista’ jiftaħ dawk ix-xatbiet ta’ ħalqu, imdawrin bi snien li jwerwru?

⁷Dahru ringieli ta’ tarki, is-sinsla siġill magħluq.

⁸Marbutin it-tarki waħda mal-oħra u ma tgħaddix arja bejniethom.

⁹Kull waħda mqabbda ma’ seħbitha, marbuta sew u ma tinqalax.

¹⁰L-għatis tiegħu jagħti d-dawl, għajnejh bħat-tbexbix tal-għodwa.

¹¹Minn ħalqu joħorġu fjammi, u jittajjar xrar tan-nar.

¹²Minn imnifsejh joħroġ il-fwar bħal minn borma tagħli kemm tiflaħ.

¹³In-nifs tiegħu jqabbad il-ġamar u jtajjar minnu x-xrar.

¹⁴F’għonqu tbejjet is-saħħa, id-dgħufija taħrab minn quddiemu.

¹⁵Il-faldi ta’ laħmu magħquda ħaġa waħda, marsusa miegħu bla ma jitħarrku.

¹⁶Sħiħa daqs blata qalbu, iebsa daqs mola ta’ mitħna.

¹⁷Bil-biża’ li jnissel jitkexkxu l-qawwijin, jintelqu fl-art imwerwrin.

¹⁸Is-sejf li jolqtu xejn ma jagħmillu, lanqas il-lanza, il-vleġġa u l-ġavellott.

¹⁹Il-ħadid jistmah tiben, u l-bronż għuda mherrija.

²⁰L-ebda vleġġa ma ġġagħlu jaħrab, il-ħaġar li jwaddbulu jsir fuqu tiben.

²¹Għalih il-mazza mhix għajr qasba, hu jiddieħak b’min ixejjirlu l-lanza.

²²Żaqqu bil-ponot bħal xaqquf jaqta’, jifrex it-tajn qisu xatba.

²³Iqalla’ l-qiegħ bħal borma tagħli, jixkuma l-baħar bħal griġjol.

²⁴Iħalli mnejn jgħaddi tranja bajda, il-qiegħ tistħajlu talla’ x-xagħar qotni.

²⁵M’hawnx fid-dinja ieħor bħalu maħluq ma jibża’ minn ħadd.

²⁶Iħares f’wiċċ kull min hu kburi; hu sultan fuq il-bhejjem selvaġġi kollha.”