Read Maltese Bible with DC – IL-BIBBJA IL-KOTBA MQADDSA ĠOB 42 Bible Online

ĠOB 42 - Maltese Bible with DC – IL-BIBBJA IL-KOTBA MQADDSA bible

ĠOB 42

¹Ġob wieġeb lill-Mulej u qallu

²“Jien naf li inti tista’ kollox, u ebda ħsieb minn tiegħek ma jfixkluh.

³Int għedt, ‘Min hu dan li jrid joskura fehemti bla ma jifhem?’ U tassew jien tkellimt fuq ħwejjeġ ma nifhimhomx, ħwejjeġ kbar wisq għalija, ma nafhomx.

⁴Int għedt: ‘Ismagħni, u jien nitkellem; nistaqsik, u int għallimni.’

⁵Fuqek jien b’widnejja smajt; imma issa b’għajnejja rajtek.

⁶Għalhekk inċedi u nindem fit-trab u r-rmied.”

⁷Wara li l-Mulej temm jgħid dan il-kliem lil Ġob, qal lil Elifaż[60] it-Temani: “Jiena inkurlat għalik u għaż-żewġt iħbieb tiegħek. Għax intom ma għedtux is-sewwa fuqi bħalma għamel il-qaddej tiegħi Ġob.

⁸Ħudu, mela, seba’ għoġiela u seba’ mtaten u morru għand il-qaddej tiegħi Ġob u offruhom b’sagrifiċċji maħruqa għalikom. Ġob, il-qaddej tiegħi, jitlob għalikom u jiena minħabba fih ma nikkastigakomx għall-bluha li wrejtu meta ma tkellimtux is-sewwa fuqi bħal Ġob il-qaddej tiegħi.”

⁹Elifaż it-Temani, Bildad is-Suħi, u Sofar in-Nagħmi marru u għamlu kif qalilhom il-Mulej. U l-Mulej ta wiċċ lil Ġob.

¹⁰Lilu, għax talab għal ħbiebu, reġġgħu għal li kien qabel u kattarlu għal darbtejn il-ġid kollu li kellu.

¹¹Imbagħad ħutu kollha, subien u bniet, u dawk li kienu jafuh qabel, ġew għandu jarawh u kielu miegħu f’daru. Huma wrewh is-sogħba tagħhom u farrġuh għad-diżgrazzji kollha li l-Mulej bagħat fuqu, u tawh kull wieħed minnhom munita u ċurkett tad-deheb.

¹²U l-Mulej bierek il-ħajja l-ġdida ta’ Ġob aktar minn dik ta’ qabel, u kellu Ġob erbatax-il elf nagħġa u sitt elef ġemel, elf żewġ barrin u elf ħmara.

¹³Kellu wkoll seba’ subien u tlitt ibniet.

¹⁴Bintu l-kbira semmieha[61] Ġemima, lil ta’ warajha Kesigħa, u liż-żgħira Kerenħappuk.

¹⁵U ma kienx hemm fil-pajjiż kollu nisa li fil-ġmiel iħabbtuha mal-bniet ta’ Ġob. Missierhom tahom qasma mill-wirt ma’ ħuthom is-subien.

¹⁶Wara dan kollu Ġob għex mija u erbgħin sena u ra ’l uliedu u wlied uliedu sar-raba’ nisel,

¹⁷u miet xiħ u mimli bl-għomor.