Read Maltese Bible with DC – IL-BIBBJA IL-KOTBA MQADDSA ĠOB 5 Bible Online

ĠOB 5 - Maltese Bible with DC – IL-BIBBJA IL-KOTBA MQADDSA bible

ĠOB 5

¹“Għajjat issa! Min se jwieġbek? Lejn liema qaddis tista’ ddur int?

²Iva, il-korla tifni lill-iblah, l-għira teqred lill-bniedem bla għaqal.

³Jien rajt lill-iblah ixenxel għeruqu, u malajr jinsteħet ix-xitel tiegħu;

⁴mitluqa wliedu bla m’għandhom min jgħinhom, misħuqa f’bieb il-belt[12] bla min jaqbeż għalihom.

⁵Il-ħsad tiegħu jikluh l-imġewħin, ilaqqtuh sa minn qalb ix-xewk, u l-għatxana jagħmlu għal ġidu.

⁶Le, ma jitnissilx mill-art in-niket, lanqas ma jinbet mill-art il-hemm.

⁷Huwa l-bniedem li jiled l-għawġ, bħalma ’l fuq ix-xrar jittajjar.

⁸Li kont minnek ’l Alla kont infittex, u l-kawża tiegħi quddiemu nqiegħed.

⁹Hu jagħmel ħwejjeġ kbar ma nifhmuhomx, għeġubijiet li ma jingħaddux.

¹⁰Hu jagħti x-xita lill-art, u jibgħat l-ilma fuq wiċċ ir-raba’.

¹¹Hu jtalla’ fil-għoli lill-umli, u jqiegħed fis-sod lill-imsejknin.

¹²Huwa jħarbat il-pjanijiet ta’ dawk li moħħhom jilħqilhom, biex ma jirnexxix għemil idejhom.

¹³Hu jaqbad l-għorrief fil-ħażen ta’ moħħhom, u l-ħsieb tal-qarrieqa jiġi fix-xejn;

¹⁴binhar isibu d-dlam ma’ wiċċhom, u fl-aqwa tax-xemx iteftfu qisu billejl.

¹⁵Hu jeħles il-fallut minn ħalqhom, u l-miskin minn id il-kefrin.

¹⁶Hekk il-miskin jerġa’ jittama, u l-ħażen ikollu jsodd ħalqu.

¹⁷Hieni tassew il-bniedem li Alla jwiddbu; tistmerrx, mela, il-kastig mingħand Xaddaj[13].

¹⁸Għax Hu jidrob u jdewwi, Hu jolqot, u jdejh ifejqu.

¹⁹Sitt darbiet jeħilsek mill-ħsara, u fis-seba’ ma jmissekx id-deni.

²⁰Jeħilsek mill-mewt fi żmien il-ġuħ, u fil-gwerra mid-daqqa tas-sejf.

²¹Tkun imkennen minn swat l-ilsien, ma tibżax mill-qerda meta tiġi.

²²Ħerba u għaks tiddieħak bihom, u l-bhejjem selvaġġi ma tibżax minnhom.

²³Mal-ġebel[14] tar-raba’ jkollok ftehima, u l-bhejjem selvaġġi jkunu fis-sliem miegħek.

²⁴Ikollok is-sliem fl-għarix tiegħek, kull xħin iżżuru ssibu bla mittiefes.

²⁵Tara wkoll li bosta jkunu wliedek, u n-nisel tiegħek bħal ħaxix tar-raba’.

²⁶Tasal għall-qabar misjur bl-għomor, bħalma jinġabar fi żmienu l-qamħ.

²⁷Ara, Ġob, dan flejnieh u hu minnu; agħtih widen u tgħallmu sewwa.”