Read Maltese Bible with DC – IL-BIBBJA IL-KOTBA MQADDSA ĠOB 6 Bible Online

ĠOB 6 - Maltese Bible with DC – IL-BIBBJA IL-KOTBA MQADDSA bible

ĠOB 6

¹Ġob wieġeb u qal:

²“Li kellu jintiżen l-għali tiegħi, u f’miżien titqiegħed il-ħsara kollha tiegħi,

³itqal tkun din minn ramel il-baħar; għalhekk kliem addoċċ jitlaq fommi.

⁴Għax weħlu fija l-vleġeġ ta’ Xaddaj, u qed tixrob ruħi l-velenu tagħhom; it-twerwir ta’ Alla tkeskes għal fuqi.

⁵Jaqaw jinħaq il-ħmar bil-ħaxix quddiemu? Se jgħajjat il-gendus bl-għalf taħt geddumu?

⁶Jittiekel forsi bla melħ it-tisjir ħelu? Fih xi togħma l-abjad tal-bajd?

⁷Ikel bħal dan ma jduqux ħalqi; jitqażżu bħal ikel imħassar.

⁸Kemm nixtieq li Alla jisma’ talbi! Kemm nixtieq jaqtagħli xewqti!

⁹Mhux li kien jaqtagħha li jtemmni, jitlaq idu u jqaċċatni mid-dinja!

¹⁰Imqar hekk, jibqa’ għalija xi faraġ, u nifraħ ukoll fl-eqqel tbatija, għax ma ċħadtx kliem il-Qaddis.

¹¹Imma x’saħħa għandi biex inżomm iebes? X’tamiet għandi li ntawwal għomri?

¹²Hija saħħti saħħa taż-żonqor, u ġismi jewwilla bronż?

¹³Mhux xejn hi l-qawwa li ngħin ruħi? Mhux kull rifda twarrbet minni?

¹⁴“Il-magħkus jistħoqqlu ħniena mingħand ħbiebu, imqar ikun warrab il-biża’ ta’ Xaddaj.

¹⁵Iżda ħuti bħal wied qarrqu bija, għabu bħal qiegħ il-widien

¹⁶li jkunu mqallgħin bil-ħalla tas-silġ, xħin togħdos fihom il-borra;

¹⁷fl-istaġun tan-nixfa jixxuttaw, bil-qilla tas-sħana jitqaxqxu.

¹⁸Lejhom idawru l-karwani r-rotta tagħhom, jidħlu fl-inxif u jinqerdu.

¹⁹Jgħarrxu għalihom il-karwani ta’ Tema, il-merkanti ta’ Saba jittamaw fihom.

²⁰Imma jiregħxu talli ttamaw, xħin jaslu ħdejhom jinstarmu.

²¹Issa tabilħaqq sirtu xejn għalija, rajtu l-ħsara u qabadkom saram.

²²Qatt għedtilkom tagħtuni xi ħaġa, jew għalija tħallsu minn ġidkom?

²³Teħilsuni minn dwiefer l-għadu, jew tifduni minn idejn il-kiefra?

²⁴Għallmuni, mela, u jiena niskot, fehmuni fejn stajt mort żball.

²⁵X’qawwa fih il-kliem sinċier! Imma x’jiswa t-tmegħir tagħkom!

²⁶Jaqaw intom il-kliem tridu tlumu, u tqisu riħ kliem min qata’ qalbu?

²⁷Intom sa fuq iltim titfgħu x-xorti, u mqar ħabib tagħkom tinneguzjawh.

²⁸Imma issa, nitlobkom, ħarsu lejja, f’wiċċkom żgur li ma nigdibx.

²⁹Erġgħu aħsbuha li ma ssirx inġustizzja. Aħsbuha, hawn fin-nofs il-kawża tiegħi.

³⁰Jinsab forsi xi qerq fuq ilsieni? Tgħid ma jtigħemx ħalqi l-ħwejjeġ ħżiena?