Read Maltese Bible with DC – IL-BIBBJA IL-KOTBA MQADDSA ĠOB 7 Bible Online

ĠOB 7 - Maltese Bible with DC – IL-BIBBJA IL-KOTBA MQADDSA bible

ĠOB 7

¹“Ħajjet il-bniedem mhix forsi xogħol bilfors fuq l-art? u għomru mhux bħal jiem il-ħaddiem mikri?

²Bħalma lsir jixxennaq għad-dell, u bħalma l-mikri jistenna l-ħlas,

³hekk xhur fiergħa kienu sehmi, u ljieli dwejjaq messew lili.

⁴Jekk nimtedd, ngħid: “Meta se nqum?” u meta nqum, ngħid: “Meta se jidlam?” u hekk nixba’ nhewden sa ma jidlam.

⁵Laħmi ddewwed u mtela qxur, ġildi nqasmet u tnixxi l-marċa.

⁶Eħfef minn mekkuk għaddew jiemi, u bla tama ntemmu.

⁷Ftakar li ħajti buffura riħ, u għajnejja ma jerġgħux jaraw ir-risq.

⁸L-għajn li kienet tarani ma tilmaħnix iżjed, int twaħħal għajnejk fuqi u jien nispiċċa.

⁹Bħalma ddub sħaba u ma tidhirx aktar, hekk min jinżel fil-qabar ma jerġax jitla’;

¹⁰qatt iżjed ma jerġa’ lejn daru, u daru ma tafux aktar.

¹¹Għalhekk m’iniex se nżomm fommi sieket, irrid niżfoga mid-diqa ta’ ruħi, ninfexx fit-tgemgim fl-imrar ta’ ħajti.

¹²Jaqaw jien il-baħar jew il-mostru tal-qiegħ[15], biex int tqiegħed għassa fuqi?

¹³Jekk ngħid: ‘Issa jserraħni friexi, is-sodda tnaqqasli l-krib tiegħi,’

¹⁴hemm int bil-ħolm tiġi taqtagħni u twaħħaxni bil-fantażmi.

¹⁵Għalhekk jagħżel it-tagħliq għonqi, nippreferi l-mewt għal għadmi.

¹⁶M’iniex se ngħix għal dejjem, ħallini, mela, għax jiemi buffura riħ.

¹⁷X’inhu l-bniedem biex int tagħti daqshekk kasu, twaqqaf ħsiebek fuqu,

¹⁸iżżuru kull filgħodu, u toqgħod tiflih kull waqt?

¹⁹Se twarrab ħarstek minn fuqi, għallinqas sakemm nibla’ r-riq tiegħi?

²⁰Jekk jiena dnibt, x’għamiltlek lilek, int li tgħarrex b’għajn miftuħa fuq il-bniedem? L-għala ħadtni b’mira tad-daqqiet tiegħek, l-għala jien ta’ piż għalik?

²¹Ma tistax tagħder in-nuqqas tiegħi u tħalli għaddejja l-ħtija tiegħi? Għax jien ma ndumx ma nkun mimdud taħt l-art; Int tfittixni u jiena ma nkunx iżjed.”