Read Maltese Bible with DC – IL-BIBBJA IL-KOTBA MQADDSA ĠOB 8 Bible Online

ĠOB 8 - Maltese Bible with DC – IL-BIBBJA IL-KOTBA MQADDSA bible

ĠOB 8

¹Qabeż jitkellem Bildad is-Suħi u qal:

²“Kemm se ddum titkellem hekk, tvenven bħal riħ qawwi kliem fommok?

³Jista’ Alla jgħawweġ is-sewwa? Jista’ Xaddaj imur kontra l-ġustizzja?

⁴Bilfors li dinbu kontrih uliedek, biex hu raddilhom il-ħlas ta’ ħtijiethom.

⁵Issa jekk inti tfittex lil Alla u tittallab il-ħniena ta’ Xaddaj,

⁶jekk safi int u sewwa għemilek minn issa jdur favur tiegħek u jroddlok id-dar li tistħoqq lilek.

⁷Ħaġa żgħira jkun il-ġid ta’ qabel ħdejn il-kobor li għad ikollok.

⁸Staqsi biex tara lin-nisel ta’ qabilna, u seddqu billi tistħarreġ għajdut ix-xjuħ.

⁹Għax aħna ġejna lbieraħ u xejn ma nafu, bħal dell li jgħaddi ħajjitna fuq l-art.

¹⁰Mhux huma li jgħallmuk u jgħidulek dan il-kliem ħiereġ minn qalbhom?

¹¹‘Ma jikbirx il-papir[16] barra mill-għadira, lanqas jagħmel is-simar mingħajr l-ilma,

¹²ikun għadu jtalla’, mhux tal-qtugħ, u jinxef qabel il-ħxejjex kollha.

¹³Hekk jiġrilu kull min jinsa ’l Alla, it-tama ta’ min iwarrbu tinqered.

¹⁴Għax irqiqa sifja t-tama tiegħu, għanqbuta l-fiduċja tiegħu.

¹⁵Iserraħ fuq daru iżda ma tiflaħx, jaqbad magħha iżda ma żżommx.

¹⁶Iħaddar ġmielu għal għajn ix-xemx, jifrex iż-żraġen mal-ġnien tiegħu,

¹⁷ixeblek ma’ munzell ġebel għeruqu, u jieħu t-tira mill-blat.

¹⁸Xħin, imbagħad, jinqala’ minn postu jiċħdu dan u jgħid: ‘Ma nafikx’.

¹⁹Dan hu, mela, it-tmiem ta’ ħajtu, u mit-trab jinbtu oħrajn.’

²⁰Le, Alla ma jwarrabx il-bniedem sewwa, lanqas ma jwieżen lil min jagħmel id-dnewwa.

²¹Hu jerġa’ jimla bit-tbissima lil fommok, u ’l xufftejk b’għajjat ta’ ferħ.

²²Imbagħad jinksew bil-mistħija l-għedewwa tiegħek, u l-għarix tal-ħżiena ma jkunx iżjed.”