Read Maltese Bible with DC – IL-BIBBJA IL-KOTBA MQADDSA ĠOB 9 Bible Online

ĠOB 9 - Maltese Bible with DC – IL-BIBBJA IL-KOTBA MQADDSA bible

ĠOB 9

¹Ġob wieġeb u qal:

²“Hekk hu, tassew, u hekk inżomm jien: Kif jista’ l-bniedem jieħu raġun ma’ Alla?

³Jekk jogħġbu jidħol f’qorti miegħu, lanqas iwieġbu waħda minn elf.

⁴Hu għaref minn moħħu u ta’ ħila kbira; min qatt ħarraxha miegħu u ħareġ bis-sliem?

⁵Hu jheżżeż il-muntanji bla ma jintebħu, u jaqlibhom ta’ taħt fuq fil-korla tiegħu.

⁶Hu jċaqlaq l-art mis-sisien tagħha, u l-kolonni tagħha jitriegħdu.

⁷Jikkmanda x-xemx u ma titlax, jaqfel il-kwiekeb u ma jfiġġux.

⁸Hu waħdu firex is-smewwiet, u saħaq dahar il-mostru tal-baħar.

⁹Hu ħalaq l-Orsa u l-Ġgant, it-Trajja u l-Kmamar ta’ Nofsinhar[17].

¹⁰Hu jagħmel ħwejjeġ kbar ma nifhmuhomx, għeġubijiet bla għadd.

¹¹Jekk jgħaddi minn ħdejja ma narahx, iwarrab minni bla nittendi bih.

¹²Jekk jiġi jaħtaf min se jżommu? Min se jgħidlu: ‘X’int tagħmel hemm?’

¹³Alla ma jreġġax lura l-korla tiegħu. Dawk li għenu lil Raħab[18] għotru taħtu.

¹⁴Kif nista’ mela nwieġeb jiena? Xi kliem nagħżel għal quddiemu?

¹⁵Għad li jien ġust ma nistax inwieġeb, u flok id-dritt ikolli nitlob il-ħniena.

¹⁶Jekk inħarrku ma jweġibni xejn, għad li nemmen li leħni jisimgħu.

¹⁷Hu jgħaffiġni mqar għal xagħra, u jkattarli l-ġrieħi għal xejn b’xejn.

¹⁸Lanqas nifs ma jħallini nieħu, għax sax-xaba’ bl-imrar jimlieni.

¹⁹Jekk niġu għall-qawwa, min aqwa minnu? Jekk niġu għall-ħaqq, min se jħarrku?

²⁰Għalkemm innoċenti fommi, jikkundannani, għalkemm bla ħtija, Hu joħroġni b’ħati.

²¹Bla ħtija jien; ma rridx naf bija nnifsi, ħajti sirt nistmellha.

²²Hu kollu wieħed, għalhekk ngħid, ‘L-innoċenti u l-ħatja Hu jeqred xorta waħda.’

²³Jekk jaqa’ għal għarrieda flaġell tal-mewt, Hu jidħak bit-twegħir tal-innoċenti.

²⁴Jekk taqa’ xi art f’idejn wieħed kiefer, Hu li jgħammad għajnejn l-imħallfin tagħha. Jekk mhux Hu, min jista’ jkun?

²⁵Jiemi għaddejja eħfef minn ġerrej, igerbu malajr bla ma jaraw riżq,

²⁶jiżgiċċaw qishom dgħajjes bil-qasab, bħal ajkla nieżla b’salt għall-priża.

²⁷Għalkemm ngħid: ‘Irrid ninsa l-għali tiegħi, ħa nibdel wiċċi u nidher ferrieħi,’

²⁸naqta’ qalbi bit-tbatija kollha tiegħi, għax naf li int ma żżommnix bla ħtija.

²⁹Ladarba tqisni ħati, għalfejn noqgħod nitħabat għal xejn?

³⁰Imqar jekk ninħasel bis-soder, u nnaddaf idejja bil-lissija,

³¹fil-ħama terġa’ tgħaddasni, u ħwejġi stess jitqażżuni.

³²Alla mhux bniedem bħali biex nisfidah, jew immorru flimkien għall-qorti.

³³M’hawn ħadd li jaqta’ l-ħaqq bejnietna, u juża s-setgħa fuqna t-tnejn,

³⁴biex ibiegħed minn fuqi l-virga tiegħu, u ma jwerwirnix id-driegħ tiegħu.

³⁵Kieku żgur nitkellem u ma nibżax minnu; imma mhux hekk il-każ tiegħi miegħu.”