Read Maltese Bible with DC – IL-BIBBJA IL-KOTBA MQADDSA SALMI 10 Bible Online

SALMI 10 - Maltese Bible with DC – IL-BIBBJA IL-KOTBA MQADDSA bible

SALMI 10

¹Għaliex, Mulej, int hekk imbiegħed? Għaliex tinħeba waqt il-bżonn?

²Fi kburitu l-ħażin lill-fqir jaħqar, jaqbdu fin-nases li nasablu.

³Il-ħażin jiftaħar bix-xewqat ta’ qalbu, fir-regħba tiegħu jisħet u jżeblaħ lill-Mulej.

⁴Fi kburitu jkasbar lill-Mulej, u f’xejn ma jfittxu; u Alla ma jidħolx fi ħsibijietu.

⁵Jirnexxi dejjem fi triqtu, xejn ma jilħquh il-ġudizzji tiegħek, bl-għedewwa tiegħu jiddieħak.

⁶Jgħid f’qalbu: “Ma niċċaqlaqx! Minn nisel għal nisel ebda ħsara ma tilħaqni!”

⁷Saħta, qerq u dnewwa fuq fommu; għawġ u ħsara fuq ilsienu.

⁸Wara l-ħitan tas-sejjieħ jissajja, fil-moħbi joqtol nies bla ħtija; għajnejh ifittxu lill-imsejken.

⁹Jgħasses fil-moħbi bħal iljun fil-bejta; jgħasses biex lill-fqajjar jaħtaf, jaqbdu u jkaxkru fix-xibka.

¹⁰Jitbaxxa, mal-art jinxteħet; l-imsejkna jaqgħu taħt il-qilla tiegħu.

¹¹Jgħid bejnu u bejn ruħu: “Alla nesa; ħeba wiċċu, ma jħarisx iżjed.”

¹²Qum, Mulej! Erfa’ idek, o Alla! La tinsihomx lill-imsejknin.

¹³Għax għandu l-ħażin ikasbrek, o Alla, u jaħseb li int ma tfittxux?

¹⁴Int tara, tabilħaqq, l-għawġ u l-ħsara, u taħseb biex f’idejk teħodhom. F’idejk jintelaq l-imsejken; tal-iltim int sirt l-għajnuna.

¹⁵Kisser int driegħ il-ħażin u l-midneb, ilħaqlu ħżunitu sakemm ma ssiblux iżjed.

¹⁶Sultan hu l-Mulej għal dejjem ta’ dejjem; inqerdu l-ġnus minn artu.

¹⁷It-talba tal-imsejknin smajtha, Mulej; int taqtgħalhom ix-xewqa ta’ qalbhom,

¹⁸biex tagħti raġun lill-iltim u l-maħqur; u bniedem tal-art ma jbeżżax aktar.