Read Maltese Bible with DC – IL-BIBBJA IL-KOTBA MQADDSA SALMI 102 Bible Online

SALMI 102 - Maltese Bible with DC – IL-BIBBJA IL-KOTBA MQADDSA bible

SALMI 102

¹Talba ta’ wieħed imnikket, li fit-telqa tiegħu jiftaħ qalbu mdejqa quddiem il-Mulej.

²Mulej, isma’ t-talba tiegħi, ħa tasal għandek l-għajta tiegħi.

³Taħbix wiċċek minni f’jum id-dwejjaq tiegħi; ressaq widintek lejja, meta nsejjaħlek fittex weġibni!

⁴Għax jiemi bħal duħħan jgħibu; u għadmi bħal ħuġġieġa jaqbad.

⁵Nixfet qalbi bħal ħaxix maqtugħ; ninsa niekol sal-ħobż tiegħi.

⁶Bl-ilfiq qawwi tiegħi sirt għadma u ġilda.

⁷Qisni xi tajra fix-xagħri; sirt bħal kokka qalb xi ħerba.

⁸Nibqa’ mqajjem u nitniehed, bħal għasfur waħdu fuq bejt.

⁹Il-jum kollu jgħajruni l-għedewwa tiegħi, jixegħlu għalija u jidgħu bija.

¹⁰Niekol l-irmied bħal ħobż, u x-xorb tiegħi bid-dmugħ inħallat,

¹¹minħabba l-għadab u s-saħna tiegħek, għax inti rfajtni, u mbagħad tlaqtni.

¹²Jiemi qed jonqsu bħad-dell ta’ filgħaxija; u jien bħal ħaxix qiegħed ninxef.

¹³Imma int, Mulej, għal dejjem tibqa’; minn nisel għal nisel it-tifkira tiegħek.

¹⁴Inti tqum u tħenn għal Sijon, għax hu ż-żmien u l-waqt li tħenn.

¹⁵Għax għażiż għall-qaddejja tiegħek il-ġebel tagħha; tiġihom ħasra mit-trab tagħha.

¹⁶Ħa jkollhom il-ġnus il-biża’ ta’ ismek, Mulej, u s-slaten kollha tal-art il-biża’ tas-sebħ tiegħek,

¹⁷meta l-Mulej jerġa’ jibni lil Sijon, u jidher fis-sebħ tiegħu.

¹⁸U jisma’ t-talb tal-mitluqin, ma jistmellx it-talb tagħhom.

¹⁹Jinkiteb dan għan-nisel li għad jiġi, u poplu ġdid għad ifaħħar lill-Mulej.

²⁰Il-Mulej iħares ’l isfel mill-għoli tas-santwarju tiegħu, u jittawwal mis-sema lejn l-art,

²¹biex jisma’ l-krib tal-ilsiera, biex jeħles ’il dawk li huma għall-mewt.

²²U hekk jixxandar f’Sijon isem il-Mulej, u f’Ġerusalemm it-tifħir tiegħu,

²³meta l-popli flimkien jinġemgħu, u saltniet biex jaqdu l-Mulej.

²⁴Neħħieli saħħti f’nofs it-triq, qassarli ż-żmien ta’ ħajti.

²⁵Jien ngħidlu: “Alla tiegħi, la teħodnix f’nofs ħajti, la darba żmienek idum għal dejjem.

²⁶L-art int waqqaftha sa mill-bidu; għemil idejk huma s-smewwiet.

²⁷Huma jgħaddu, imma int tibqa’; bħal libsa huma lkoll jiqdiemu, tbiddilhom bħal libsa u jintemmu.

²⁸Imma int li int tibqa’; bla tmiem huma s-snin tiegħek.

²⁹Ulied il-qaddejja tiegħek ikollhom darhom; nisilhom jibqa’ għal dejjem quddiemek.”