Read Maltese Bible with DC – IL-BIBBJA IL-KOTBA MQADDSA SALMI 103 Bible Online

SALMI 103 - Maltese Bible with DC – IL-BIBBJA IL-KOTBA MQADDSA bible

SALMI 103

¹Ta’ David. Bierek, ruħ tiegħi, il-Mulej! B’qalbi kollha nbierek l-isem qaddis tiegħu.

²Bierek, ruħ tiegħi, il-Mulej, u la tinsiex il-ġid kollu li għamel miegħek.

³Hu li jaħfer dnubietek kollha; ifejjaq il-mard tiegħek kollu;

⁴jifdi lil ħajtek mill-qabar; iħaddnek bit-tjieba u l-ħniena;

⁵ixabba’ bil-ġid snin ħajtek, u bħal tal-ajkla tiġġedded żgħożitek[186].

⁶Il-Mulej jagħmel is-sewwa, u l-ħaqq mal-maħqurin kollha.

⁷Hu għarraf lil Mosè l-ħsieb tiegħu, l-għemejjel tiegħu lil ulied Iżrael.

⁸Ħanin u twajjeb il-Mulej, idum ma jagħdab u kollu mogħdrija.

⁹Ma joqgħodx jitlewwem magħna, u anqas jinkorla għal dejjem.

¹⁰Ma mexiex magħna skont ma ħaqqhom ħtijietna; ma ħallasniex skont ma ħaqqha ħżunitna.

¹¹Daqskemm huma s-smewwiet ’il fuq mill-art, hekk hi kbira tjubitu ma’ min jibża’ minnu;

¹²daqs kemm hu mbiegħed il-Lvant mill-Punent, hekk hu jbiegħed minna ħtijietna.

¹³Bħalma jħenn il-missier għal uliedu, hekk iħenn il-Mulej għal min għandu l-biża’ tiegħu.

¹⁴Għax hu jaf kif aħna magħġuna, jiftakar li aħna trab.

¹⁵Bħall-ħaxix il-ħajja tal-bniedem, bħall-fjur tar-raba’, hekk jikber.

¹⁶Tgħaddi ż-żiffa minn fuqu, u jispiċċa, u ħadd aktar ma jagħraf fejn kien.

¹⁷Imma t-tjieba tal-Mulej minn dejjem għal dejjem ma’ dawk li għandhom il-biża’ tiegħu, u s-sewwa tiegħu ma’ wlied uliedhom;

¹⁸ma’ dawk li jħarsu l-patt tiegħu, u jiftakru fil-preċetti tiegħu u jħarsuhom.

¹⁹Waqqaf il-Mulej it-tron tiegħu fis-sema, u saltnatu fuq kollox taħkem.

²⁰Bierku l-Mulej, anġli tiegħu kollha, setgħana u qawwija li tagħmlu l-ordni tiegħu, malli tisimgħu leħen il-kelma tiegħu.

²¹Bierku l-Mulej, eżerċti tiegħu kollha, qaddejja tiegħu, li tagħmlu r-rieda tiegħu.

²²Bierku l-Mulej, għemejjel tiegħu kollha, kullimkien fis-saltna tiegħu. Bierek, ruħ tiegħi, il-Mulej!